Аллаһы Тәгаләдән бирелгән укытучы (фото)

Аның беркайчан да орышканы, булдырмыйсың дип әйткәне истә түгел. Һәрчак укучыларында өмет уятып, үзе җаны-тәне белән бирелеп укыткан фәненнән тәм табып эшләде. Инде мәктәпне тәмамлаганга да 12 ел булып китте. Ләкин бүген дә физкультура дәресенә барырга дисәләр мин каршы килмәс идем. Чөнки баскетбол, волейбол ярышларына йөреп, без башка мәктәп тормышы белән таныша ала идек, шулай ук яңа иптәшләр дә табылмый калмады. Ә иң мөһиме, ел буе спорт ярышларында актив катнашкан укучыларны Фәнил Фаилевич Казанга «Уникс» баскетбол командасының уеннарын карарга алып бара иде. Безгә, ул чактагы яшүсмерләр өчен үз кумирыңны күрүдән дә зур бәхет булдымы икән. Юктыр, мөгаен.

Бүген дә бер дә үзгәрмәгән ул безнең укытучыбыз. Гел шундый яшь, йөзеннән елмаюы китми, янәшәсендә тормыш иптәше Гөлчәчәк һәм балалары. Гөлчәчәк ханым да биредә укытучы булып эшли, шулай кулны-кулга тотынып эшләгәндә һәм яшәгәндә генә бәхетле балалар үстереп, үзең дә ил-көнгә игелек кылып буладыр ул. Фәнил абый үз үрнәгендә балаларында да спортка мәхәббәт уятты һәм алар район күләмендә генә түгел, ә республикакүләм ярышларда да уңышларга ирештеләр. Менә шундый күркәм гаилә белән мактанырлык та, ә укытучыбыз безнең өчен һәрчак иң яратканы. Чөнки андыйлар Аллаһы Тәгаләдән генә бирелә шул.