“Дуслык учагы”нда без дә дуслар таптык (+фото, видео)

Бер мәйданга өч өлкәнең балалары җыелган, бәйрәмнең башланганын көтәләр. Уңайлы форсатны кулдан ычкындырмыйча, Киров өлкәсенең Малмыж районы мәгәриф бүлеге җитәкчесе Остренко Валентина Викторовнага мөрәҗәгать иттек.

- Хәерле көн, Валентина Викторовна, пионер иле нинди ил ул? Бүгенге пионерлар һәм дуслык бәйрәме сездә нинди хисләр уята?
- Мин пионер булган кеше. Безнең өчен балачак белән пионер сүзе бербөтен. Пионерга керү бәйрәм иде. Ә бүгенге "Дуслык учагы"на килсәк, әлеге бәйрәм бик кирәк, күрәсезме, монда балалар гына түгел, олылар да дуслаша.

Юлыбызны Мари иленнән килгән балалар ягына тоттык. Мари республикасы мәгариф җитәкчесе Яндыбаева Лариса Алексеевна да бик аралашучан ханым булып чыкты.

- Лариса Алексеевна, Пионер иле нинди ил иде?

- Хәерле көн, кызлар! Быел пионерлар хәрәкәтенә 95 ел тула. Мин үзем пионерлы балачак иленнән. Безнең тормыш кызыклы һәм мавыктыргыч үтте.

Мәгариф һәм фән министры урынбасары Илдар Ринатович янына барырга бераз куркып торсак та аның бүгенге җитәкчеләр янында иң яше икәнен күрү безгә күпмедер кыюлык өстәде.

- Илдар Ринатович, ничек сезгә бүгенге бәйрәм, ул сезгә кайсы ягы белән якын?
- Бүгенге бәйрәм искиткеч, кызлар. Бүген монда балачак, дуслык, пионерлар... Мин дә элеккеге пионер, мин дә галстук таккан кеше. Минемчә, пионерия яшьләрне берләштерә торган көч.
- Сезнеңчә пионер галстугы кешегә нинди җаваплылык өсти?
- Пионер галстугы таккан кеше башкаларга үрнәк булырга тиеш.

Районыбыз башлыгы Рамил Рашитовичның ТНВ каналына интервью биреп бетергәнен көтеп тордык та, янына ашыктык. Сеңелкәшләрен каршы алган кебек елмаеп каршы алды ул.

- Рамил Рашитович, бүгенге бәйрәмнән алган беренче кичерешләрегез нинди?
- Кичерешләрем бик куанычлы. Әйтерсең лә, үземнең балачагыма кайттым. Бүген безнең районда "Дуслык учагы"ның 52 нчесе кабыначак. 52 ел элек нигез салынган традиция югалмасын, алга таба да дәвам итсен иде.

Аягына киез итекләр киеп, "Валенки" биеп йөрүче мәгариф бүлеге җитәкчесе Алия Юнысовна тагын да яшәреп киткән кебек тоелды. "Әйдәгез, матурларым",- дип колач җәеп каршылады ул безне.

- Алия Юнысовна, әлеге чараны оештыручыларның берсе буларак сез бүгенге бәйрәм белән кәгагатьме?
- Бик кәнагать, кызлар! Мин бүген үзем дә коллегаларым белән очраштым. Бүген балаларга дуслыкның нәрсә икәнен аңларга шәп мөмкинчелек бар.
- Сер булмаса әйтегез әле, пионер галстугыгыз сакланамы?
- Саклана! Әле мин комсомолга да кереп өлгердем.

Үзләренең тирмәләре янында кунаклар каршылап торучы Чепья мәктәбе директоры Нурмиев Сәйдәш Тәлгатовичка да берәр сорау бирергә булдык.

- Сәйдәш абый, пионерларны кире кайтарыр идегезме?
- (Бераз уйланып торды ) Кайтарыр идем, минемчә, ул юнәлешне бетермәскә генә кирәк булгандыр, бәлки. Пионер сүзе ул зур сүз иде. Балалар аңа омтылып яшәде.

Юлыбызны мәйдан кырына урнашкан тукталышлар ягына таба дәвам иттек. Безне иң кызыктырганы, әллә каян янып кып-кызыл булып торган будка - "Пионерия" будкасы үзенә чакыра иде. Безне муенына галстук бәйләп торучы Җәмилә апа каршы алды. Ул мөгаен пионер галстугына тугрылык саклаган сирәкләрнең берседер.

- Җәмилә апа, беренче тапкыр үткәрелгән Дуслык учагын хәтерлисезме?
- Хәтерлим кызлар, бик дулкынландыргыч булды ул, 1965 нче елда үткәрелгән ул бәйрәмдә катнашуым белән бәхетле мин.
- Хәзерге балалар белән элекке пионер балалар арасында аерма бармы?
- Әлбәттә бар. Пионер ул беренче дигән сүз. Хәзерге балаларга менә шул беренчелеккә омтылу, нәрсәгәдер ышанып яшәү җитеп бетми кебек. Менә бүгенге дуслык бәйрәме дә балаларны берләштерү өчен бик кирәк.

Бәйрәмгә җыелган балалар отрядларга бүленеп, тукталышлар буйлап йөри башлагач, без дә алар артыннан иярдек. Һәр тукталышта бер тормыш. Әлеге мәйданда табигатьне сакларга , кул эшләренә дә, җырларга, биергә дә, тарихны да, әдәбиятны да, техниканы да өйрәтәләр. Баш та эшли, кул да эшли, аяклар да йөреп тора. Күзәтеп кенә өлгер, эшләп кенә җитеш! 12 нче төркем - җитәкчеләребез төркеме иде. Алар да барлык тукталышларны узып , биремнәрне үтәп чыктылар. Башка вакытта җитди булган җитәкчеләребезнең балачакларына кайтуын күрү безгә балачак тормышының кадерле һәм вакытлыча гына икәнен аңларга мөмкинлек бирде. Сагындырырсың инде, Балачак һәм Дуслык бәйрәме.