Кече Лызи мәктәбендә гүзәллек аша кешелеклелек сыйфатлары тәрбиялиләр

Күп еллар дәвамында эшләп килүче "Вуюись" һәм "Веретенце" удмур , рус фольклор ансамбльләре моңа ачык мисал булып тора. Ансамбльләр район, зона, республика күләмендә үткәрелгән бәйгеләрдә дипломант һәм лауреат исемнәренә лаек була. "Юлда йөрү кагыйдәләре","Мин тынычлык яклы","Экстремизмга - юк!" рәсем күргәзмәләре зурлап үткәрелә. Мәктәп укучылары республика һәм Рәсәй күләмендә үткәрелгән рәсем, кул эшләре бәйгеләрендә призлы урыннар яулыйлар. Музейларга экскурсияләр оештыру, "Ватанны саклаучылар көне", "Җиңү бәйрәме", батырлык дәресләре, "Аҗаган" хәрби-спорт уены, ветераннар һәм армия сафларында хезмәт иткән егетләр белән очрашу кебек чаралар оештыру патриотик тәрбиянең нигезе булып тора. Наркомания, җинаять кебек тискәре гамәлләрне кисәтү максатыннан, мәктәптә тәрбия эше югары дәрәҗәдә оештырылган. Шулай ук мәктәптә туган якның тарихын өйрәнүгә багышланган музей эшли. Мәктәп тормышын баетучы "Белем көне", "Өлкәннәр көне", "Көзге бал", "Яңа ел", чыгарылыш укучылары белән очрашу, 23 февраль, 8 март, экологик марафон, "Сәламәтлек көне", "Соңгы кыңгырау" кебек бәйрәм чаралары да елдан-ел яңа сулыш ала.

Дәрестән тыш вакытта мәктәптә эшләүче "Табигать дуслары", "Үз кулларыбыз белән бүләкләр", ЮИД түгәрәкләренә дә укучылар бик теләп йөри. Күп еллардан бирле эшләп килүче туристлык түгәрәге эшчәнлеге дә аерым мактауга лаек. Балалар бик теләп палаткалар куярга, асылмалы параллель кичүне үтәргә, җирлектә ориентлашырга, учак ягу тәртибенә өйрәнәләр. Мәктәп туристлары даими рәвештә республикада призлы урыннар яулыйлар, Татарстан Республикасы командасы составына кертелү дә коллективның зур казанышы.

2010 елдан кече Лызи мәктәбе "Сәламәтлекне ныгытырга ярдәм итүче алтын дәрәҗәдәге мәктәп" исеменә ия. Бу спорт өлкәсендәге уңышларның иң югарысы дияргә кирәк. Укучыларның спортның төрле төрләре буенча күп тапкырлар район, зона һәм республика күләмендә җиңүгә ирешүләрендә укытучылар Чулпан Гарәфиева, Марат Исмәгыйлев һәм Сергей Григорьевларның өлешләре бик зур.

Фоторепортажны биредэ карый аласыз: baltaci.ru