Маһикамал Сафиуллинага — 100 яшь!

Улы-кызы, килен-кияве, онык-оныкчыклар, туруннар мәһабәтле йортка җыйналган. Өйнең нуры булып балкып утырган әбекәйне район башлыгы Рамил Нотфуллин бүләкләргә күмде, әби лаеклы ялга чыкканчы хезмәт куйган «Яңа тормыш» җәмгыяте, авыл җирлеге баш-лыклары җылы юрган бүләк иттеләр, әбине хөрмәтләп район ветераннар советы рәисе Радик Михайлов та килгән.

Маһикамал апа Иске Салавыч авылы кызы, Яңгул авылына тормышка чыга, тормыш иптәше белән өч кыз, ике егет үстерәләр, бүгенге көндә 12 онык, 24 оныкчык, өч турун — нәселнең лаеклы дәвамчылары.

100 яшькә җитәр өчен нинди булырга кирәк?! Тапталган сорау, әмма барыбер кызыклы сорау. Районыбызда мондый мөхтәрәм яшькә җитеп гомер итүчеләрдән Түнтәр авылыннан Әминә Зарипова, Кургем авылыннан Фекла Халтурина бар. Һәммәсендә җавап бер — чиста күңелле булырга һәм кер күтәрми яшәргә кирәк. Маһикамал апаның керләнеп йөрергә вакыты булмагандыр аның, дөньяның авырлыгы, сугыш афәте аны да читләтеп үтмәгән, Яңгул егетенә кияүгә чыкканчы кайгысын да күргән, инде хәсрәт җилләре читләп үтә дисәң, картаймыш көнендә ире Габделхагы, беренче баласы, Габделхагы белән зарыгып көтеп алган газизе Саниясе авырып үлеп китә, Нуриясе билгесез чирдән инвалид коляскасына кала. 90 яшенә кадәр кызлар кебек йөгереп йөргән, оныклар тәрбияләгән әбиебез басыла, тагын җитмәсә ковид зәхмәте эләгә, аннан инде Маһикамал апаның аяклары йөрмәс була. Шулай да Маһикамал апа яшәү рухын югалтмый, улы Габделфәрт, килене Әминә белән матур гына яшәвен дәвам итә.

— 43 ел инде менә бергә торабыз, — ди килене Әминә ханым. — Башта әби-бабай белән яшәдек, кайнатам 2001 елда мәрхүм булды, хәзер менә әби белән генә яшибез. Шушы төп йортта ике кыз, ике ул үстердек, кызларыбызның берсе Казанда, берсе Саба районында кияүдә, оныклар үстерәләр, улларыбыз үз яныбызда. Әйбәт яшәдек, тавышланышып тормадык. Кайчан кайтсак та, өй ишегебез ачык, әниебезнең йөзе ягымлы булды. Оныкларны үстерешергә булышты, һәрберсен аерым яратты. Хәзер дә оныклары аз гына килми торса, ник килмиләр, нәрсә булды икән дип борчыла башлый. Аллаһының чиксез рәхмәтләре булсын аңа, озын гомерле булсын, бөтен тормышыбызның нуры әле ул.

Маһикамал апа сөйләшергә бик ярата, их, янәшәмдә үзем шикелле бер олы кеше булсачы, ди ул. Гел тормышына шөкер итә, сый-хөрмәттә яшим бит, дип Аллаһка рәхмәтләр укый, киленнәрен мактый, уллары белән горурлана. Шулкадәр ихлас ул, кул биреп күрешкәндә район башлыгының да, рәхмәтләрен белдереп, кулларын үбә. Ә районыбыз башлыгы Рамил Нотфуллин гаять тә юмарт бүләкләде йөзьяшәр өлкәнебезне — Рәсәй Президенты Владимир Путинның котлау хатын тапшырды, үз исеменнән Рәхмәт хаты белән бүләкләде, ТР Авыл хуҗалыгы һәм азык-төлек министры исеменнән Рәхмәт хаты да килгән, ТР Агросәнәгать комплексының ветераннар советыннан котлау хаты да бар. Күркәм мизгелләрдән дә күркәме — Рамил Нотфуллинның әбигә «Мактаулы ветеран» дигән медаль тапшыруы булгандыр. 100 яшьлек Маһикамал әбинең күкрәгендә балкыган медаль аның «Яңа тормыш» хуҗалыгына керткән тиңсез хезмәте, сугыш елларында тылда фидакарь хезмәтенең тулы чагылышы. Маһикамал апа хуҗалыкка төрле эшкә йөрсә, Габделхагы ат җиккән, колхозның бөтен төр хезмәтен дә башкарган.

Карты белән 50 елдан артык гомер итеп, матур йорт җиткергәннәр, тәрбияле балалар үстергәннәр. Маһикамал апаның бүгенге көндә туганнарыннан сеңлесе, 75 яшьлек Бибигөл апа әле исән-сау, ул Ульян каласында яши. Аңа да апасы кебек озын гомерләр насыйп булсын.
Мактаулы ветеран үзен хөрмәт итеп, зурлап килүчеләргә чиксез рәхмәтләрен җиткерде, балалары, туганнары, оныклары да бик куанып калдылар. Йөзьяшәр әбиләребез күп булсын иде әле, чөнки районыбыздагы уңайлы тормыш шартлары, өлкәннәргә карата кадер-хөрмәт, сәламәтлек программаларының максатчан эшләве моңа тулысынча мөмкинлек бирә ала.