Наталья Павлова район башлыгын 105 яшьлек юбилеена да чакырды (фото)

Наталья Григорьевна олуг юбилее белән тәбрикләргә килгән һәркемне "105 яшьлегемә дә шушы составта килерсез", дип каршы алды. Зарлануны белмәс, бүгенге тормышыннан канәгать булган ветеран яшьлегендә бик күпне күргән. Урманын да кискән, Арча, Шәмәрдән станциясенә җәяү орлыкка да йөргән.

- Барлык авырлыкны да күрдек инде. Алай булса да үземнең шушы яшькә җиткәнемә бик аптырыйм, - ди юбиляр.

Тормыш иптәше Александр да бик иртә фаҗигале төстә вафат була. Бүген биш баласы, онык-оныкчыклары хөрмәтендә Урта Көшкәт авылының дүрт йортлы гына Хуторная дип исемләнгән урамында булганына шөкер итеп яшәп ята ул. Торган җирләрем оҗмах, ди юбиляр. Чыннан да, чут-чут килеп кошлар сайрый, тирә-якта шаулап агачлар үсә, урам кырларында үсүче бәбкә үләнне ничек итеп оҗмахка тиңләмисең, ди. Әле бит 90 яшьлек юбилейны да һәркем шулай сау-сәламәт, камил акыл белән каршы ала алмый.