Балтачта Сабантуйга бүләк җыю көне билгеле булды

Әрәпә җыюда катнашучылар иң элек район мәдәният үзәге янындагы мәйданга җыелып, район башкарма комитеты җитәкчелегенең хәер-фатихасын алып, бистә урамнары буйлап таралачак.

Сабантуйга бирнә, бүләк җыюны безнең Балтач якларында матур һәм үзенә күрә бер кабатланмас исем белән Әрәпә җыю дип атыйлар. Бу безнең бер миллилегебезне, гореф-гадәтебезне күрсәтә. Әрәпә – ул Сабантуйга әзерлекнең бер йоласы. Бүләк җыюны икенче төрле - сөрән салу яки сөрән сугу дип тә атап йөртәләр.

Әрәпә җыю – бер күңелле күренеш, урам буйлап бизәлгән атларга утырган яшьләр, бала-чага, колгалар күтәргән милли киемнәрдән киенгән егет-кызлар гармун моңнарына кушылып җырлар җырлап үтәләр. Ә кайсыбер авыл җирлекләрендә Сабантуйга йомырка җыю йоласы да сакланып калган.

Гадәттә, әрәпә җыючыларны йорт хуҗасы яисә хуҗабикәсе капка төбендә бүләге белән көтеп ала. Бүләкләрен соңгы килгән атка, иң өлкән көрәшчегә яисә туры баганага менүчегә дип махсус атап бирүче якташларыбыз да очрый. Яшь кызлар баш батырга дип сөлге чигеп тә биргәннәр. Шунысы да кызык, әрәпә вакытында Сабантуйга кунакка кайтканнар да бүләк тапшыра. Ә яшьләр, рәхмәт йөзеннән, аларга багышлап җырлар һәм такмаклар башкара. Әлеге йола Сабантуйга чакыру буларак кабул ителә.

Рәсми Балтач