Кичләтеп кенә бер шигырь...

Төн... һәм мин...
Күңелләр бербөтен...
Күңелем төннәргә сатылган
Карасы ягылмый күңелгә
Бары тик сагышы сарылган...

Төн... һәм мин...
Күзгә күз карашып
Бары тик күңелләр сөйләшә...
Күзеннән күренә, ул минем
Ахры ал күлмәктән көнләшә...

Төн ... һәм мин...
Чикерткә көй яза...
Ишетми дип уйлап беркем дә
Төн һәм мин сүзләрен эзлибез...
Язабыз күктәге эңгергә...

Төн... һәм мин...
нәкь минем шикелле
Төсләре чем кара бу төннең...
Тик үзе җылы ул, йомшак ул...
Кочагы шикелле кемнеңдер...

Лилия Гарифуллина.

Автор фотосы.