Норма Сабантуенда җирле эшмәкәр Фәнил Зәйнуллин сюрприз ясады

Эшкә дә, мәйданда җырларга-биергә дә батыр Норма, Кариле, Нормабаш, Пүскән, Чапшар, Кили халкы бер булып, бердәм булып бәйрәм итте. Иганәчеләргә рәхмәт әйтеп бетерә алмый җирлек башлыгы. Яхшы аппаратура булу гына да ничек ярдәм итә. Фәнил Зәйнуллинның сюрпризы гына да үзе ни тора - Норма Сабантуенда Татар дөньясында танылган артист, моң иясе Булат Нигъмәтуллин бит! Санаулы гына җыр башкарса да, аны күрү, тыңлау, алкышлау бәйрәм тамашачысының күңеленә аеруча да хуш килде. Алып баручылар - Борнак егете Ирек Хәкимуллин, Балтачлы Айдар Гарәфетдинов: "бүген иртәнге сәгать 3 тә яңгыр яудырдык, тагын кичке 5 тә яудырачакбыз, аңарчы бәйрәмне гөл итәргә кирәк" дип, мәйданны да, ярышларны да ут итте алар. Мәйданда абсолют батыр да үз җирлекләреннән - Норма авылы егете Рәниф Гарифуллин калды. Туры баганага Альберт Каюмов менде. Атлар чабышы бер генә узышта үткәрелеп, беренче урынны Кили авылыннан "Виктори" кушаматлы аты белән Шамил Гарипов, икенчелекне Чапшар егете Фәннур Сәлахов "Карлыгач"ы , өченчелекне шулай ук Чапшардан Фирдүс Әхтәмов "Кашка"сы белән алды. Әнә шулай, үз Сабантуйларында дәрәҗәле урыннарны үзләре яулап, Нормалылар ел буена җитәрлек бәйрәм тәэсирләре белән калды.