Яратып эшләгән эш кенә куаныч китерә (+фото)

Әлеге җирлек өчен шактый таныш шәхес Флёра Кәлимуллинаның исемен авылдашлары күңелендә яңарту максатыннан, Норма, Кариле авылынының хатын-кызларын ел саен чәй табынына дәшү дисеңме, 23 февральдә ел саен яше- картының, бала-чаганың мәш килеп тау шуу, бәйрәм концертлары, тематик кичәләр, спектакльләр – болар әле соңгы вакытта үткән чаралар гына.

– Тырышып, бердәм булып эшләгәч, нәтиҗәләр дә бик матур. Тагын да кызыклы очрашулар оештырып эшләргә язсын, киләчәккә дә планнары зурдан кызларның, уңышлар аларга, – ди авылдашлары.

Кызлар авылдашлары өчен җаннарын фида кылырга әзер, туган төбәкләренең бөтен матурлыгын, күркәм, тырыш халкын, данлы-талантлы якташларын башкаларга да таныту теләге белән янып йөриләр.

Мәдәният хезмәткәре ул матур чаралар белән җитәкчелек итүче генә түгел, ул декоратор, режиссер, методист, сценарист, хореограф, тәрбияче, тегүче-модельер, сәхнә киемен юып, ертылганын тегүче дә, буяучы-маляр, йөк ташучы да, чүкеч тотып кадаклаучы да. Мең дә бер төрле эш башкарсалар да, Зилә белән Лилия хезмәтләреннән зарланмыйлар, ә киресенчә ямь һәм тәм табып эшлиләр.

– Авылдашларның эштән соң ял итәргә дип мәдәният йортына килергә атлыгып торулары, чараларның тулы заллар белән үтүе, халыкның мөрәҗәгать иткәндә безгә каршы килмәве – хезмәтебезнең иң зур нәтиҗәсе. Ә тырыш хезмәт нәтиҗәсе эш барышындагы килеп туган барлык авырлыкларны да, йокысыз төннәрне дә оныттыра, – ди Зилә Шәрипова.

Норма мәдәният йортында әнә шулай үз эшләренә чын күңелдән бирелгәннәр эшли. Яратып эшләгән эш кенә куаныч китерә шул.