«Йолдызлык» конкурсында безнекеләр янә балкыды

Кичә Биектау районы Шәпше авылында «Созвездие-Йолдызлык» конкурсының зона этабының бүләкләү тантанасы булып үтте. Анда районыбызның нәфис сүз осталары, сәхнә тотучы биючеләре һәм җыр-моңга гашыйк балалары катнашты.

Әлеге чарадан соң район башкарма комитеты җитәкчесе урынбасары Илһам Гайнетдинов үзенең хис-кичерешләре белән бүлешеп: «Районыбыздан катнашкан балалар бик матур урыннар алып, әти-әниләрен, укытучыларын, гомумән, безне сөендерделәр. Шушы балаларны әзерләргә көче, тырышлыгы кергән һәр кешегә ихлас күңелемнән рәхмәт сүзләремне ирештерәсем килә. Әле бу беренче адым гына, алда әле безне Казан, финал көтә. Анда да безнең матур, күркәм уңышларыбыз булыр дип ышанып калам. Афәрин, балалар. Без сезне яратабыз, без сезнең белән горурланабыз, уңышлар һәммәбезгә дә», диде.

Фото: автор