Балалар бакчаларында суык икәнлеген беләсезме?

Редакциябезгә килеп ирешкән моң-зарлар арасында шушындый да җөмлә бар.

Суык икәнлеген беләбез, балаларын дүшәмбе көнне алып килеп, кире алып кайтып китүчеләр дә булды. Төш вакытында алучылар да күбәйде. Баласын бер атна йөртми торучылар да бар. Чөнки бик суык, балалар чирли, бөтен кешенең дә баласын төшлектә алып китү мөмкинлеге юк, калын итеп киендерсәң дә йоклаганда алар барыбер туңа. Андыйларга тешне кысып, йөрәкне басып түзәргә кала.

Бүген район хакимиятендәге бу өлкәдәге җаваплы белгечләр белән элемтәгә кердек, ә анда ягулык җибәрү буенча эшләр бара. Инде район башкарма комитеты җитәкчесенең карары да чыккан, “Шушы көннәрдә мәгариф учреждениеләренә – мәктәпләргә, балалар бакчаларына җылылык бирә башлаячаклар”, диделәр безгә. Кайбер учреждениеләрдә бу иртәгә үк тә булырга мөмкин әле, Алла боерса.

Фото: pixabay.com/ru