Балтачта әти-әниләр артистка әверелгән?

“Бөек Тукаебыз театр сәнгате турында “Театр яктылыкка, нурга илтә”,- дип язып калдырган. Быел Россиядә театр елы дип игьлан ителгәч, бу сүзләрнең мәгьнәсенә тагын да ныграк төшенә барабыз. Бердәм булып районыбызның барлык мәдәният, мәгариф учреждениеләре театр уйнарга алынып килә.

Шуның кечкенә генә бер мисалы булып, шушы көннәрдә генә 1 номерлы ясле-бакчаның кече яшьтәгеләрнең 2 нче төркеменә йөрүче балаларның әти-әниләре көче белән сәхнәләштерелгән “Шалкан” әкияте булды. Бу чара, бер яктан әти-әниләрнең осталыгын күрсәтеп торса, икенче яктан балаларны тәрбияләү чарасы да булып торды. Әкият геройлары аша балалар өлкәннәрне хөрмәт итәргә, үзара тату һәм дус булырга өйрәнделәр, туган телебездә матур итеп сөйләшү күнекмәләре алдылар. Менә шулай итеп, коллективыбыз әти-әниләр белән тыгыз элемтәдә булып, матур гына эшләп килә, зур рәхмәт аларга”,- дип хәбәр итә безгә төркем тәрбиячесе Гөлназ Гыйльметдинова.

Фото: Г.Гыйльметдинова