Дамир: “Инглиз теле укытучысын яратмыйм”

" Инглиз теле укытучысын яратмыйм. Дәрескә барасы килми. Укыйсы да... Сез ни диярсез?".

- Бүгенге көн белемле булуны таләп итә. Яратсаң да, яратмасаң да - уку мәҗбүри. Онытма, укытучы да - кеше, һәрбер кешедәге кебек, аңарда да уңай һәм тискәре сыйфатлар бар. Бу очракта сиңа инглиз теле укытучысында бары тик яхшы сыйфатларны гына күрергә тырышып, конфликтка кермәскә өйрәнергә кирәк. Төптәнрәк уйлап кара: кайсы ягы белән ошамый ул сиңа? Бәлки, бу ошамаган сыйфатларның ник сине борчуын ачыкласаң, җиңелрәк булыр. Белем алуыңны арттыр, күбрәк укы, күбрәк шөгыльлән. Тормышта гел шулай кыенлыклар туып тора, ышан, ул безгә ошаган кешеләр җыелмасыннан гына тормый. Һәрберсенә дә ачуың килеп, үзеңә файдалы якны кайгыртмасаң, гел ризасыз булып яшәячәксең. Бер дә булмаса, өстәмә, репетитор белән шөгыльләнеп кара. Уңышлар!

Фото: anna.org.ua