Эшкә бирсәң чын күңел

Озак еллардан бирле балалар белән ихластан эшләп, аларның осталыкларын ачу юнәлешендә бөтен барлыгын бирүче Сәлимә апа өчен мондый рәхмәтләргә ирешү бик сөенечле хәл. Чөнки эшенең нәтиҗәсен күрә һәм бәяли беләләр. Ә хезмәт җимешләре - укучылары аны әниләредәй якын күреп яраталар һәм хөрмәт итәләр. Вконтакте төркемендәге шәхси битендә Сәлимә ханымның: «Балачактан «әртист» булырга хыяллансам да насыйп булмады» дигән сүзләре бар. Ләкин ул моның белән генә тукталып калмыйча, үз осталыгын балаларга бирә алган. Һәм бүгенге көндә ул аларга «Минем нәни артистларым» дип яратып дәшә. Афәрин, бала җанлы мондый шәхесләребез күбрәк булып, балаларыбыз шундый кешеләрдән иҗат итәргә өйрәнсеннәр иде дип телисе кала.