КӨШКӘТБАШТА КЫШ БАБАЙ БЕЛӘН НИНДИ ГАЛӘМӘТ БУЛГАН (фото)

Ул башта залга балаларны дәшәргә кирәклеген әйтте. Матур музыка астында балалар залга үттеләр. Мәктәп җитәкчесе Илсөя Илгизовна укучыларны бәйрәм белән котлады һәм яхшы укучыларны бүләкләп узды. Шулай ук мәчеттән дә кунаклар бар иде. Әдһәм абый белән Илгиз абый да балаларга, авыл халкына матур теләкләрен җиткерделәр һәм мәчет исеменнән укучыларга Яңа ел бүләкләре тапшырдылар. Мәктәпкә Яңа ел бәйрәмен үткәрүдә акчалата ярдәм күрсәткән Сүрия һәм Фәргать Һадиевларга, Гүзәлия һәм Газинур Хәсәновларга ихлас теләкләребезне ирештердек.

Бәйрәмдә тамашачылар үз йортыннан тавыкларын ташлап чыгып киткән Әтәчнең чак кына Төлке авызына эләкми калуын, Бүре белән Этнең йокы даруы биреп Кыш бабайны йоклатулары һәм Кар кызын урлап качуларын, Убырлының үз кызын Кар кызы итеп куюларын сорап ялынуын, Куянны үз өеннән куып чыгарган Төлкенең ничек итеп көлке хәлгә калуын тамаша кылдылар. Кыш бабайның күчтәнәчләрен серле йомгак алып килде. Кыш бабабызның хәтере чуалып китеп, йомгакны башка якка тәгәрәткән иде дә, йомгак җебенә эләгеп киез итек килеп чыкты. Йомгакны дөрес якка тәгәрәткәч кенә чана тулы күчтәнәчләр килде. Бәйрәм ахырында Кыш бабай Яңа ел хуҗасы Әтәчкә көчле алкышлар астында медаль тапшырды. Яңа ел изге теләкләр язылган кәгазьләрне сибеп җибәргәч, һәр бала матур теләкләрне укырга ашыкты. Бәйрәм шат җырлар, дәртле биюләр белән дәвам итте.

Мәктәп коллективы