Марат Исмәгыйлев: "Укучыларыбыз мәктәбебез горурлыгы"

Мәктәпне тәмамлаган укучылар да мәктәпнең горурлыгы һәм туган мәктәпләрендә аларның һәрберсе өчен урын бар.Укучылар үзләренең мәктәпләрен онытмыйлар, кайтып серләре, хыяллары белән уртаклашалар, укыткан укытучыларына рәхмәтләрен белдерәләр. Укучыларның тормышта үз урыннарын табуыннан һәм үзләренең талантларын үстерүләрен дәвам итүләреннән педагогик коллектив та бик канәгать. Соңгы 15 елда 8 чыгарылыш сыйныф укучысының медальгә ия булуы үзе үк бик күпне сөйли.

- Сыйфатлы белем бирүдә төп юнәлеш булып профильле укыту тора. Мәктәптә химия-биология профиле эшли. 10-11 сыйныф укучылары 100% профильле укытуга җәлеп ителгән. Бу юнәлештә консультацияләр беренче класстан ук башлана. Алай була алмый, диярсез. Укучы үзенә якын һөнәрне мәктәпкә тәүге тапкыр аяк атлагач ук сайлый һәм шул юнәлеш буенча түгәрәкләргә языла. Авыррак үзләштерелгән фәннәрдән өстәмә шөгыльләнүләр үткәрелә. 8 сыйныфтан соң инде икенче ел рәттән укучылар белән райондагы оешмаларда булып, һөнәрләр белән якыннан танышабыз, - ди мәктәп директоры Марат Исмәгыйлев.