Бөек Ватан сугышы ветеранын 95 яшьлек юбилее белән социаль яклау министры котлады

Гөлзидә Газизуллина, 16 март 2021 - 12:11

2734

Таузар авылында яшәүче сугыш ветераны Мөдәрис Зәкиев бүген үзенең 95 яшьлек юбилеен билгеләп үтә.

Бөек Ватан сугышы ветеранын 95 яшьлек юбилее белән социаль яклау министры котлады

- Бу яшькә җитәрмен дип башыма да кереп карамады. Шөкер, тормышларыбыз мул, өстәлләребез тулы ризык хәзер, - ди ветеран юбилее белән котларга килүчеләрне каршы алганда.

Юбилее белән котларга килгән Татарстан Республикасының Хезмәт, халыкны эш белән тәэмин итү һәм социаль яклау министры Эльмира Зарипова, район башлыгы Рамил Нотфуллин, социаль яклау бүлеге җитәкчесе Алсу Гатиятуллина һәм җирле җитәкчеләрне Мөдәрис абый күтәренке кәефтә каршылады, үзен олылап килүләренә рәхмәтле булуын белдерде.

Мөдәрис абый иң элек шахтада эшли. Сугыш башлангач, армия сафларына алына. Утлар-сулар кичеп, Берлинга кадәр барып җитә. Фашистлар белән күзгә-күз очрашкан минутлары турында аеруча дулкынланып сөйли. Үлем янәшәдә булганда да гомере бетмәгәч, исән-сау кайтырга насыйп була үзенә. Кайткач ук колхозга эшкә керә һәм лаеклы ялга чыкканчы биредә хезмәт куя. Тормыш иптәше Мәгъфируз белән өч кыз тәрбияләп үстерәләр. Мәгъфируз апа бүгенге көндә мәрхүмә инде.