“Минем кебек итеп әнине берәү дә тәрбияли алмаячак” (фото)

Кечкенә генә авыл йорты. Аның һәрбер бүрәнәсе Әлфия апаның хатирәләрен саклый. Биредә шатлыклы вакыйгалар да, мәңгелеккә йөрәк ярасы булып калган югалтулар да булган. Шул югалтулар сынаган да ахры юбилярны. Аның сәламәтлеге нык какшаганга да ун ел вакыт узган. Бүгенге көндә ул аралашмый һәм тәрбиягә мохтаҗ. Кызы вафат булганнан соң бердәнбер терәге булып калган улы Габделфәрт һәм аның гаиләсе бүген Әлфия апаны кадер-хөрмәттә яшәтәләр. Социаль хезмәткәр кирәкмиме сезгә, дигән сорауга да әбекәйнең улы: “Минем кебек итеп әнине берәү дә тәрбияли алмаячак”, диде. Улының әнисенә булган хөрмәте аның күз карашыннан ук сизелеп тора.
Әлфия апаны без дә ихластан бүгенге гомер бәйрәме белән котлыйбыз. Кадерле әни, хөрмәтле әби булып яшәргә язсын сезгә тагын да.
Әлфия Габделхакованың тормыш юлы турында газетабызның киләсе саннарында укый алачаксыз.