Үз мисалымда ышандым

Тешем бик каты сызлап, шешә башлагач, Норма теш поликлиникасына килергә туры килде. Мине исә туп-туры Азат Урановичка җибәрделәр. Хәлем җиңелләрдән түгел иде, тешемне ярырга туры килде. Төгәл һәм тиз арада куелган диагноз, табибның үз эшен яхшы белүе мине күңелсез-лекләрдән коткарып калды. Әле аның өстенә табибның яхшы мөнәсәбәте үзе генә дә ни тора?! Шәфкать туташы Зәлия Зиннәтуллинаның һәм санитарка Рая Тимофееваның кешелеклелеге хакында язмасам зур гөнаһ булыр иде. Үзегез сайлаган һөнәргә һәрчак тугры калып, намус белән эшләгәнегез, авырсынмый һәр авыруның зарын тыңлап, аларның тешләрен дәвалауда күрсәткән сабырлыгыгыз өчен рәхмәт сезгә. Сер түгел, чит-ятка дип әйтмим, еш кына якыннарына да хезмәт күрсәтергә авырсынган кешеләр күп. Ә сез төрле авыллардан килгән райондашларыбызны якты йөз белән каршы алып, тиешле дәрәҗәдә хезмәт күрсәтәсез. Авыр һәм үтә дә җаваплы хезмәтегездә зур уңышлар, сабырлык, үзегезгә сәламәтлек, гаиләләрегезгә бөтенлек телим.