Сөт ризыкларын алып кайту әти-әниләргә йөкләнгән...

Ильнур, 31 декабрь 2014 - 13:42

2559

"Балаларның сөт ризыкларын авыл медпунктына китереп бирәләр иде. Соңгы айларда Чепьяга үзегез барып алыгыз диләр.

Сөт ризыкларын алып кайту әти-әниләргә йөкләнгән...

Бу бөтен җирдә дә шулаймы? Әллә безнең Шода авылы бәбиләре өчен генәме?" - дип Мөхәммәт Сәләхетдинов сорау бирде.

Район үзәк хастаханәсенең балалар консультациясе педиатры Динара Закирова:
- 3 яшькә кадәрге балаларга бирелә торган сөт ризыкларының бер өлеше Балтачта кала, калганнары бүленеп, Чепья һәм Яңгул больницаларына җибәрелә, - дип белдерде.

Сорауга җавап эзләп, Чепья больницасына мөрәҗәгать иттем. Анда:
- Безнең зонага караган авыллардан әти-әниләр үзара төзелгән график буенча килеп алып китеп медпунктка тапшыралар. Аннары калган әниләр авыл фельдшерыннан килеп алалар. Шода авылы Куныр авыл җирлегенә карый. Кунырдан әти-әниләр чират буенча килеп алып китәләр, Шодага дигән сөт ризыкларын да биреп җибәрәбез, - дип җавап бирделәр.

Куныр авыл җирлеге идарәсеннән исә:
- Ул сөт продуктларын алып кайту безнең вазыйфага кермәгән. Идарәнең шәхси машинасы да, 5 көн саен Чепьядан аларны ташырга дип бүлеп бирелгән бензины да юк, - дип белдерде.

Шуннан соң әлеге мәсьәләгә ачыклык кертү өчен район үзәгенннән шактый ерак булган Нәнәгәр, Смәел авыл җирлекләренә шалтыратып сораштырып карадым.

Аларда да балаларның сөт ризыкларын алып кайту әти-әниләргә йөкләнгәнлеге ачыкланды. "Исемлек буенча график төзелгән, һәр әти-әни үзенең чиратында шәхси машинасы белән барып Яңгул больницасыннан продукцияне авыл медпунктына алып кайтып бирә",- диделәр.

Фото: http://sibkray.ru/news/1/22849/