Авылларда шугалакны балалар үзләре ясый

Ильнур, 11 гыйнвар 2015 - 08:54

2387

Район үзәгендәге балалар әзер шугалакта шуганда, авылныкылар башта аны үзләре ясый, аннан гына шуарга бара. Бу безнең Шодада гына түгел, бу һәр авылда шулай.

Беркөнне урамннан Томбай биясенә таба 7-8 малайның тимераяклар асып, көрәкләр алып киткәнен күреп калган идем. (Кинәт кенә үземнең дә сабый чаклар искә төште. Ул чагында хәзергесе кебек тимераяклар булмаса да , без дә бик яратып шуа идек.)

... Күп тә үтмәде малайларның берничәсе өйләреннән чиләкләр алып китте. Баксаң, боз өстенә урыны-урыны белән су чыгып, шугалакта шумаслык иттергән. Малайлар бергәләшеп иң элек су агызып, бозны тигезләделәр. Кич кырын гына инде иртәгә рәхәтләнеп хоккей уйнарбыз дип өйләренә юл алдылар.

Ә икенче көнгә буран чыгып, бөтен җирне кар белән тутырды. Малайларга тимераякта шуу бары төшке ялдан соң гына тәтеде. Әмма аның тәме әзер шугалакта шугандагыныкыннан күпкә тәмле инде, дуслар.

Фото: https://vk.com/wall-49303298_2218?reply=2219