Балтач балалар яшүсмерләр спорт мәктәбе Кубогына волейбол ярышлары узды

Ильнур, 22 апрель 2015 - 06:23

2390

Кечкенәләр булгач, моның кадәр команда килер дип көтмәгән дә идек. 2002-2003 елгы малайлардан һәм кызлардан тупланган 16 команда җыйналды да куйды. "Бүген тагын караңгы төнсез кайта алмыйбыз икән",- диештеләр кайбер тренерлар. Шулай булды да...

Балтач балалар яшүсмерләр спорт мәктәбе Кубогына волейбол ярышлары узды

Рәхәтләнеп туп сукты балалар. Әйләнеш системасында узды ярышлар Спорт залы да чын спорт бәйрәмен хәтерләтте. Шушы ярышлар белән быелгы сезон тәмамлана дисәк тә була. Билгеле, июнь аенда узачак пляж волейболын исәпкә алмаганда. Ә ярышларыбызга килсәк, чыннан да, дустанә мөнәсәбәттә узды. Җиңүчеләребезне аеру өчен дә "нервларны" сынарга туры килде. Волейбол уенында тик кенә утырып булмый бит ул.

Балтач балалар яшүсмерләр спорт мәктәбе Кубогына дип оештырылган ярышларның җиңүчеләре булып кызлар арасында Пыжмара /тренерлары А.Зубарев/, Яңгул /Р.Гарипов/, Бөрбаш /Р.Вәлиев/ мәктәпләре уенчылары танылса, малайлар арасында Куныр /Р.Сөләйманов/, Шубан /Л.Рамазанов/, Пыжмара /А.Зубарев/ волейболчылары танылды.

Ә ярышларның "Иң яхшы уенчылары" булып Пыжмарадан Гөлинә Мөхәрләмова һәм Кунырдан Ислам Габделхаковлар бүләкләнде. Алда пляж волейболы, Сабантуйларда узачак бихисап уеннар. Мәйданда очрашканга кадәр!