Салавычлылар Айратны онытмыйлар

Ильнур, 18 ноябрь 2015 - 14:14

2467

Салавычта Айрат Зыятдинов истәлегенә кул көрәштерделәр.

Классташын, яшьлек дустын онытмый, Азат. Менә быел да яшьли арабыздан киткән кул көрәше буенча Россиянең спорт остасы Айрат Зыятдинов истәлегенә ярышлар оештырды. Салавыч мәдәният йортында үткән ярышта дуслары, әнисе Нурия ханым, район спорт оешмасы битәкчесе Рөстәм Заһидуллин Айрат турындагы истәлекләр белән уртаклашты.

Быелгы ярышларга 50 дән артык кул көрәштерүче килгән иде. "Ут" күршеләбез кукмаралылар да онытмаган. Ир-егетләр һәм хатын-кызлар арасында 4 үлчәү авырлыгында барган ярышларда түбәндәге спортчыларыбыз чемпион булып танылдылар.

Ир-егетләр арасында җиңү Салавычтан Ирек Төхвәтуллин /60 кг/, Марат Әхмәтҗанов /80 кг/, Субаштан Искәндәр Гайнетдинов /70 кг/, "Хыял" яшьләр үзәгеннән Ранил Гыйззәтуллин /80 кг/ кулында булса, хатын-кызларыбыз арасында бу бәхеткә Субаштан Раилә Корбангалиева /55 кг/, Халидә Гарифуллина /75 кг/, "Хыял"дан Гөлназ Хәкимова /65 кг/, Кукмарадан Рузия Габдрахманова /75 кг/ ирештеләр.

Команда нәтиҗәсе буенча беренчелекне Тукай исемендәге җәмгыять спортчылары яулады. Икенче урында "Хыял" яшьләр үзәге командасы булса, өченчегә Салавыч авыл җирлеге командасы лаек булды.

Ә без үз чиратыбызда ярышларны оештыруга кагылышы булган һәркемгә, аеруча ярышларның төп иганәчесе Азат Борхановка олы рәхмәтебезне җиткерәбез.