Волейбол белән тәмамладык уку елын, волейбол белән башладык (фото)

Ильнур, 6 октябрь 2015 - 05:27

2687

Үткән уку елын кызу май көннәрендә волейбол ярышлары белән тәмамлаган идек. Ул вакытта "Балтач" универсаль спорт залында 1999-2000 елларда туган егетләр һәм кызлар Балтач спорт мәктәбе Кубогына үз араларында иң осталарны ачыклаганнар иде.

Волейбол белән тәмамладык уку елын, волейбол белән башладык (фото)

Волейбол кайсы төбәктә үз югарылыгында куелган, җиңүчеләрне дә чамаларга була инде. Кызлар арасында гадәттәгече кабат Куныр /тренерлары Рәдиф Сөләйманов/, Кенә /Фәнил Ибраһимов/, Яңгул /Ринат Гарипов/ мәктәпләре уенчылары җиңүче булсалар, егетләр арасында бу урыннарны Арбор /Илдар Галимов/, Шубан /Ленар Рамазанов/ мәктәпләре, Салавыч күппрофильле лицее /Рәмис Латыйпов/ уенчылары бүлеште.

Кызлар арасында әле иң оста уенчыны аерым билгеләп уздылар. Бу исемгә Кунырдан Ләйсән Идрисова лаек дип табылды.

Инде менә октябрь аеның яңгырлы бер көнендә "Балтач" универсаль спорт залы үзенә 2000-2001 елларда туган малай-кызларны җыйды. Шаулап торды зал. Озын, хәлиткеч уеннардан соң бер-бер артлы җиңүчеләр дә билгеле булды. Егетлр арасында бу юлы кунырлыларга тиңнәр табылмады.

Алардан кала призлы урыннарны Яңгул, Бөрбаш мәктәпләре уенчылары бүлеште. Ә кызлар арасында җиңүче булып Кенә кызлары танылды. Алардан аз гына калышып призлы урыннарны Куныр, Балтач мәктәпләре уенчылары бүлеште. Узган ярышларда елап кайтып киткән Кенә кызлары бу юлы елмаеп кайтып киттеләр. Шатлыклары эчләренә сыймый иде.

Иң яхшы уенчылар исемен ярышларның хөкемдарлары Кунырдан Ислам Сөләймановка /тренер Рәдифнең улы.Н.С./ һәм Кенәдән Алинә Сәмигуллинага бирделәр.

Тиздән безнең җиңүчеләребез республикада район данын яклаячаклар. Уңышлар, аларга!