Балтачта 3 кеше ковид-19 йоктырган

Татарстанда 62 яңа COVID-19 очрагы теркәлгән, барысы да элемтә юлы белә йоктырган. Шуларның 9ы хастаханәләргә салынган, 53 кеше өйдә дәвалана, димәк хәлләре түзмәслек түгел.

Һәрвакыттагыча иң күп авыручылар урта яшьләрдәге (18 кеше) һәм өлкән буын вәкилләренә туры килә. Статистика мәгълүматларына күз салсак узган тәүлектә 30 яшьтән 50 яшькә кадәр - 18, 50 яшьтән 60 яшькә кадәр - 15, 60тан 70кә кадәр - 10, 70тән 80гә кадәр - 8, 18-30 яшьләрдәге - 6, 80-90 - 3 һәм 18 яшькә кадәр 2 кеше авыруы билгеле.

Казанда – 41, Аксубайда һәм Балтачта – 3әр, Бөгелмә, Кукмара, Яңа Чишмә, Нурлатта – 2шәр, Әлмәт, Биектау, Яшел Үзән, Лениногорск, Түбән Кама, Питрәч һәм Тукай районнарында берәр очрак теркәлгән.

18 ноябрьгә Татарстанда барлыгы 9428 COVID-19 очрагы теркәлгән, 8274 кеше, шул исәптән 51е узган тәүлектә терелгән.

Үзегезне һәм якыннарыгызны куркыныч астына куймагыз, маскаларыгызны кияргә онытмагыз.