⚡Балтачта янә бер коронавирус йоктыру очрагы текәлгән

Бүгенгә авыручыларның барысы да аралашырга яратучылар икәне ачыкланган, читтән кертелгән бер очрак та юк. Димәк гаепне үзебездән эзләргә кирәк. Санитар-гигиена таләпләрен тайпылышсыз үтәү, үзебезнең һәм якыннарыбызның куркынычсызлыгын тәэмин итүен онытмасак иде.

Алтмыш бер  авыручының егермесе хастаханәләргә урнаштырылган, димәк, хәлләре җитди. 41 пациент өйләрендә табиблар күзәтүе астында дәвалана, карантинда утыра.

Пандемиянең башлангыч чорында, коронавирус 65+ яшьтәгеләрне аямачак дисәләр дә, статитика киресен күрсәтә, авыручылар рәтендә күпчелекне урта яшьләрдәге гражданнар тәшкил итә. Ә, бәлки, бу яшьләрнең килеп туган вәзгыятькә җиңел каравындадыр?.. Ничек кенә булмасын, бүгенгә 30-50 яшь аралыгында - 18, 60-70 - 13, 18-30 - 12, 50-60 - 7, 70-80 һәм 80-90 яшьлекләр бишәр һәм 18 яшькә кадәр бер кеше әлеге инфекцияне йоктыруы расланган.

Авыручыларның географиясенә күз салсак: Яр Чаллыда - 25, Казанда - 24, Әлкидә - 2, Азнакай, Югары Ослан, Чүпрәле, Алабуга, Яшел Үзән, Лаеш, Минзәлә, Тукай, Ютазы һәм бездә берәр очрак теркәлгән.

Нәтиҗәдә Татарстанда бүгенгә, барлыгы 1980 COVID-19 ифекциясен йоктыручы исәпләнә, терелүчеләр саны 843, соңгы тәүлеккә 103 кеше туры килә.

Үзегезне һәм якыннарыгызны саклагыз.