Дару үләннәре җыярга соңга калма! (фото)

Җәй бит ул дару үләннәренә, витаминнарына бай. Кыш көне мәтрүшкәле чәйне берәр кайнатма белән тәмләп эчү бер яктан дәва булса, икенче яктан ләззәт. Керәшеннәр үләннәрне июль 6-7 сендә җыю кирәк, чөнки бу көннәрдә аларның иң файдалы вакыты, диләр.

Дару үләннәрен дөрес җыя белү аеруча мөһим. Онытмагыз: үләннәрне автомобиль юлларына, завод-фабрикаларга якын җирдән җыймаска кирәк. Шулай ук үзегезгә таныш булмаган үсемлекләрне җыюдан сакланыгыз, чөнки агулы үсемлек булырга мөмкин. Әгәр үсемлекнең барлык өлешен дә файдаланасыз икән, аны чәчәк аткан чорда җыярга кирәк. Яфракларын чәчәк атыр алдыннан җыйсагыз яхшырак.

Ә хәзер дару үләннәренең үзләре белән танышабыз.

Сары мәтрүшкә(зверобой) - көчле бәвел кудыргыч санала, аны югары температура вакытында кулланалар. Мәтрүшкә депрессиядән дәвалану чарасы да әле. Элекке заманнарда бу үләнне 99 чиргә дәва дип тә йөрткәннәр.

Мәтрүшкәнең зәңгәре аеруча да файдалы. Зәңгәр мәтрүшкә ютәлне басу үзлегенә ия, сулыш юллары ялкынсынганда, баш авыртканда кулланыла.

Көтүче сумкасының файдалы үзлекләре хакында да әйтми үтми булмый. Ул канны туктату үзлегенә ия, яраларны тиз төзәтүче дә.

Сукыр кычыткан халык медицинасында тынычландыргыч чара буларак кулланыла. Ул йөрәк эшчәнлеген яхшырта.

Җиләк чоры әле тәмамланмады, шуңа да җиләккә баргач яфрагын да җыярга иренмәгез. Мисал өчен, каен җиләкләренең яфракларын һәм җиләген ашкайнату системасын җайга салуда кулланалар. Җиләк һәм яфрак төнәтмәләрен салкын тигәндә эчәләр. Яфрак төнәтмәсе кан басымын төшерә, кан тамырларын киңәйтә, хәл кертә.

Канлут (чистотел) согы белән яраларны дәвалыйлар, сөялләрне бетерәләр. Сөялдән тилмерүчеләр өчен канлут бер дигән ярдәмче.

Бака яфрагы үләне дә күбебезгә таныш. Аның кайнатмасы белән теш сызлаганда,теш уртлары ялкынсынганда авызны чайкыйлар. Пешекләнгән яфракларын үлекләгән урыннарга,яраланган урыннарга, сөялләргә ябалар. Ә бака яфрагы төнәтмәсе йөткергәндә, бронхиаль астмалы кешеләргә файдалы.

Мунча өчен миллек (себерке) җыярга да өлгерегез. Каен миллегеннән тыш юкә, имән миллекләре дә җыярга мөмкин. Алар барысы да иммунитетны күтәрүдә, тиренең эластиклыгын һәм саулыгын

саклауда аеруча зур ярдәмчеләр.

Ландыш Гарифуллина,
КФУ студенты.

Фотолар авторныкы.