Хатын-кызлардан кемнәргә ковид бик куркыныч?

Ир-егетләрнең коронавирус инфекциясеннән хатын-кызларга караганда 1,7 тапкыр күбрәк үлүе хакында ишеткәнегез бардыр инде. Ә менә гүзәл затларның кайберләренең гомере өчен дә әлеге авыру бик зур куркыныч тудыра икән.

Хатын-кызларның организмын таҗлы вирустан гормоннар саклый, ди галимнәр. Әмма бу барлык ханымнарга да кагылмый. Герберт Вертхайм медицина колледжының соңгы курс студентлары әлеге җәһәттән махсус тикшеренүләр үткәргән һәм шундый нәтиҗәгә килгән: кайбер хатын-кызлар өчен таҗлы вирус эләктерү үлем белән тәмамаланырга мөмкин.

Гүзәл затларның организмын куркыныч инфекциядән саклаучы җенси гормоннар 50 яшьләрдә азая, шуңа бу яшькә җиткәннәрнең коронавирустан вафат булу хәвефе дә бермә-бер арта. Менопауза яшендәге ханымнарга үзләренең сәламәтлегенә бик игътибарлы булу, авыру билгеләрен сизү белән кичекмәстән дәваханәгә мөрәҗәгать итү кирәк, дип кисәтә табиблар.

Тагын бер төркем хатын-кызларга коронавирустан аеруча саклану зарур. Бу - яңа гына әни булган яшьләр. Аларның организмында бала тапканнан соң прогестерон гормоны кисәк кенә түбәнәя. Нәкъ менә шул вакытта ковидның тантана итүе ихтимал.
Үзебезне һәм якыннарыбызны саклыйк, кызлар!

Фото: pixabay.com/ru

Автор: Миләүшә Латыйпова