Үзгәрешләр... Өлкәннәр файдасына

Беренчесе – сәламәтлек саклау министрлыгы һәм хезмәт,  социаль яклау министрлыгы тарафыннан чыгарылган приказ нигезендә (РФ һәм ТР приказлары) сентябрь аеннан башлап, авылларда яшәүче, 65 яшьтән өлкән булган гражданнарны сәламәтлек саклау оешмаларына өйләреннән, яшәгән авылларыннан китереп кую турында. Август аенда Татарстан республикасының барлык районнарына автомобильләр бирү каралган. Бу автомобильләр районның социаль яклау бүлеге карамагынатапшырылып, шофер һәм социаль хезмәткәрдән кала, тагын 4 кеше сыйдырышлы булырга тиеш. Бу алдан төзелгән, авыл фельдшерларыннан алынган список – графиклар нигезендә, 65 яшьтән  узган гражданнарны, хастаханәләргә  авылларыннан алып килү өчен куелган автомашина булачак.

Авыллардан район  үзәк хастаханәсенә, Чепья, Кариле, Яңгул врачлык  амбулаторияләренә, үз участок табибларына гражданнарның диспансеризация үтү,  хроник авыруларның диспансер күренүе, флюорография,  маммография үтү  максатлары каралган. Бу приказ буенча, беренче  чиратта, 65 яшьтән  узган ялгыз яшәүче, туганнары булмаган, йөрү һәм физик мөмкинлекләре чикләгән гражданнар  списокка кертелде. Автомашинада шулай ук 4 урынның берсе коляскалы хәрәкәтләнү  мөмкинлеге чикләнгән гражданнар өчен каралган.Автомашина бирелгәннән соң, көнгә 2-3 рейс ясалып, сентябрь башыннан әлеге приказ буенча эш башланыр дип уйлыйбыз.

Чулпан Мөхәммәтгалиева

Балтач үзәк хастаханәсенең поликлиника буенча баш табиб урынбасары