Файдасы булмаса да, зыяны да булмас

Социаль челтәрләрдәге киңәшләрнең күңелемә хуш килгәннәрен үз " битемә" туплап барырга яратам мин. Ышанып, үтәп  булырдайларын. Шагыйрь Фәнис Яруллин язганча: "Файдасы булмаса да, зыяны да булмас"тайларын.

Аның чәй турында шаян шигыре бар иде. Туңсаң да эч, эсселәсәң дә эч, ашыйсың килсә дә эч, ашыйсың килмәсә дә эч, шикеллерәк. Азагы яхшы хәтердә: " Файдасы булмаса да зыяны юк аның һич. Эч!".

Сезнең игътибарга да әнә шундый, җәяү йөрүнең файдасы турында үзем тап булган киңәшләрне тәкъдим итәм. Эшләп карыйк, бер авырлыгы да юк. Кем белә, бәлки, чыннан да файдасы тияр.

Җәяү йөрү организмга менә ничек тәэсир итә икән:
3 минут йөрсәң, кан басымы төшә;
5 мин саф һавада йөрсәң, кәеф күтәрелә;
5-10 мин йөрсәң, иҗади уйлау сәләте арта;
Ашаганнан соң 15 мин йөрсәң, кандагы шикәр күләме төшә;
Ашаганнан соң көндәлек 30 мин йөрсәң, авырлык кими;
40 мин җәяү йөргән өлкән кешедә ишемия куркынычы кими;
90 мин саф һавада йөрсәң, күңелдәге начар уйлар , депрессия кими...
 

Фото: pixabay.com/ru