Инбам котьку чагыр мед луоз!

Сьӧд тушмон дуннеез котыртӥз но ӵушказ,
Сюлэмез ӝуатӥсь иворъёс вуыло.
Кин малпаз та пумтэм адями секытэз?
Семьялэсь шудбурзэ кин чидан пыр поттэ?

Ӵемысь адямиос куспын вераськонъёс туннэ нуналэ нимысьтыз ожгар операци сярысь иворъёсты эскеронэн герӟаськемын. Пӧртэм юанъёс кылдо, кудъёсызлы валэктон сётыны туж шуг луоз. Адямилэн ӟечезлы но сюлэмо луэмезлы оскон гинэ кылемын. Оло, ваньмыз та шуг-секытъёс адямиез огазеяськыса, тупаса, валаса улыны ӧтё.

1941-1945 аръёс — асьме шаерысь калык понна туж секытэн ортчем дыр. Кӧня сюлэмъёс чигиськемын! Кӧня егитъёс семья кылдытытэк кылизы! Кӧня атайёс нылпиоссылэсь нырысетӥ вамышсэс адӟытэк кылизы, нырысетӥ кылзэс кылытэк быризы, шудо улонэз шӧдытэк синъёссэс пыраклы кынизы... Нош кӧня воргоронъёс пыраклы ож лудэ кылизы... 

80 ар пала 22 инвожо но 9 куартолэзь шаерысьтымы котькуд адямилэн сюлмаз куректонэн но шумпотонэн герӟаськемын. Вашкала ӵыжы-выжыосмы улонзэс сётыса асьмелы лыз инбам но яркыт шунды кузьмазы. Туннэ нуналэ кышкытлык нош ик шаермес котыртӥз. 

Нимысьтыз ожгар операци 24 тулыспалэ 2022 арын кутскиз. Арлэсь кема ини котькуд адями умоезлы оскыса улэ. Куке но асьсэос ожмаськонъёсы шедем пересьёс мур малпаськонъёсы усьыса кайгыро, малпанъёсазы нош ик XX даурлэн секыт дыръёсыз тодазы лыкто. Тросэз соос пӧлысь валало: адями ог-огенызы тупаса улыны кулэ, соку гинэ дунне вылын зэмос умой улон кутскоз. Адямилы котьку вӧзаз юн пыкет кулэ! Семья-а со, ӵыжы-выжы-а, бускель-а, огшоры тодмо адями-а — котькудӥз дыраз зэмос юрттӥсь луыны быгатэ.

Егитъёс понна 9 Май котьку шунытэн, капчи мылкыдэн пачылмемын. Телевизор пыр чебер парад учкиськом, вормонлы сӥзем концертъёс радъяськом, митингъёсы пыриськиськом, нош зэмос шумпотонэз валаськом меда? 

Вормонлы сӥзем парадъёсы лыктэм ожысь ветеранъёслэн синвуосын пачылмем синъёссы ож вакытлэсь кышкытсэ но секытсэ возьмато, бам вылтӥзы синкылиоссы шурен бызё. Тылысь ветеранъёс но ас вылазы ож вакытлэсь зэмос шуккемъёссэ валазы, пинал дырысен соос понна улон секыт ужен но ыштонъёсын пачылмемын вал. Соин огсыр, радызъя мынӥсь улонлэсь дунлыксэ соос валало.

Вормонлэн кыӵе дунэз? Котькуд семья со понна нимаз дун тыре... 
Туала дунне вылысь югдур нош ик шимес, кышкыт вакытэ выжтэ. Жугиськон ноку но быронъёстэк уг лу, сое валаны кулэ. Адями улон — со цифра ӧвӧл, тушмонъёслэсь ӧжыт быронъёсмы шуизы ке но, котькудӥз кыӵе ке семьялэн ыштонэз, куректонэз но быронтэм сюлэм висёнэз.

«Ноку медаз луы война» — шаерысьтымы котькуд адями та кылъёсты вӧсез кадь тодэ ини. Кылбуръёсын, кырӟанъёсын «клише» кадь кутӥсько та кылъёс. Жаляса верано, туннэ нуналэ соос нош ик асдыръем луо. Политика ласянь вань югдуръёсты лыдэ басьтӥд ке, трос споръяськоно луоз. Котькуд адямилэн аслаз малпанэз, аслаз учконэз. Соин та статьяям троссэ адямиослэн кусыпъёссылы но осконъёссылы саклык висъяме потэ.

Туала улон нуналысь нуналэ бадӟым вамышъёсын азьлань мынэ. Тросэз воштӥське, выльдӥське, адямиос но нуналмысь нуналэ ужан ужъёссэс капчиятыны тыршо, выль техникаос кылдытӥсько. Улонмы туж ӝог ортче, шӧдыса ик уд вуиськы. Соин валче адямиослэн кусыпъёссы но трослы воштӥсько. 

Тодады вае али асьтэлэсь пинал дыръёстэс. Кызьы ортчытӥськоды вал огшоры нуналдэс? Кызьы ортчо вал шулдыръяськон нуналъёсты? Гуртын улон трослы секыт ке но, инкуазен огазе луыса, адями капчи мылкыдо но ӵыжы-выжыез борды кыстӥськись. Телефонъёс, интернет луымтэен нылпиос быдэс нуналзэс урамын ортчытылӥзы, шудонъёс, бызьылон, физической упражнениос, чылкыт омыр — ваньмыз нылпиослэсь тазалыксэс юнматон амалъёс луизы. Соин азьло аръёсысь пиналъёс таза, тыршись, ужась луыса будӥзы. Котькуд праздникъёсы но одно ик вань семья, бускельёс огазе люкасько вал, шулдыръяськонъёс но капчи мылкыдын, ӝӧксьӧр кырӟанъёсын но удмурт эктонъёсын ортчылӥзы. Ужъёс но ӵошен лэсьтӥськылӥзы. Али таӵе сямъёс пыраклы вунэмын кадь ини.

«Туала улон — туала куронъёс». Таӵе веран адямиос куспын тужгес ӵем кылӥське ини. Адями арысен аре аслэсьтыз ваньбурзэ будэтыны тырше. Улонысь пӧртэм удысын куронъёс нуналысь нуналэ чурытгес луо, адями но ог-огез шоры кышкасагес учке ини. Вожъяськонэн пачылмем адямиос Инмарлэсь но кышкатэк мукетызлы вӧсь каро, малпаськытэк янгыше уськыто. «Адямиез секыт кылын но виыны луэ», — дырызъя тупась эшшо одӥг веран. Зэмзэ ик, либыт сюлэмо адямилы туала калык пӧлын улыны секыт йӧтэ. Инмарлы оскыса гинэ ассэ буйгатыны, шонер сюрес кузя вамышъяны быгатэ.

Дунне вылын 10 сюрс пала религиос лыдъясько. Трос калыкъем луыса, соос пӧлысь ӧжытэз гинэ быдэс дуннее вӧлмемын. Оскон но Инмар — адямилэн валтӥсь инъетэз луыны кулэ. Инмарлэсь индылонъёссэ лыдэ басьтыса гинэ адямиос азьло кадь ик огзэс-огзы валаса но тупаса улыны быгатозы. 
Туала дыре тросэз егитъёс понна черке ветлон «модаысь» потэмын ни. Адямиос шутэтскыны зарезь дуръёсы, шуныт палъёсы ветло, нош луллы но шутэтскон инты кулэ шуыса уг малпасько.

Черк — нимысьтыз лул шутэтскон понна вӧсьлыко инты. Солэн аспӧртэмлыко зыныз йырын пӧртэм малпанъёс кылдытэ. Татын луллы зэмос шутэтскон инты. Черкын тонэ котьку возьмало, кулэ луись визь-кенеш сётыны но дась. Котькуд понэм сюсьтыл адямилэн йыраз но умоезлы оскон луонлык кылдытэ. 

Нош кызьы адями кусыпъёс, Инмарлы осконъёс но нимысьтыз ожгар операциын ог-огенызы герӟаськемын? Калык пӧлын туж чебер веран вань — «Инмарлэн эрикезтэк кут но уг лоба, адямилэн йырысьтыз йырсиез но уг усьы». Мон понна та веран туала вакытлы туж тупась луэ. Инмарлэн эрикезъя арлэсь троссэ мынӥсь нимысьтыз ожгар операци адямиез малы ке дышетыны сётэм, дыр. Вань кышкытэз адӟыса, адями валаны кулэ улонлэсь дунзэ но кулэлыксэ. 

Веран кылдоз: дунне вылын Инмарлы оскисьтэмъёс но вань ук! Зэм, озьы ке но котькуд адями кинлы ке яке малы ке оске. Улонэдлы кышкытлык ке кылдэ, одно ик йырад умоезлы оскон кылдэ. Малпанъёстэк, мур осконъёстэк улӥсь адями улонын но ассэ шедьтыны, шонер сюрессэ бырйыны уз быгаты. Умоезлы, югытэзлы оскон озьы ик азьланезлы кужым сётэ, осконлыксэ будэтэ.

Вашкала дырысен котькуд адями сюлмысь Инмарлы но солэн кужымезлы оскиз. Пересьёс инкуазь ласянь югдуръёсты учкытэк, котькуд вӧсь бадӟым праздникъёсы черке ветлӥзы. Инмарлэн юрттэтэзлы, кышкыттэмлыкезлы оскыса, вашкалаос семья, бускель кусыпъёссэс юнматыны тыршизы. Туннэ нуналэ но пересьёс Инмарлы осконзэс уг кушто, котькыӵе шуг-секытъёссы луизы ке но, умоезлы оско.

Туала вакытэ адями кусыпъёс но йырсазьзы копак воштӥськон сюрес пыр потыны кулэ. Инмарлэн сётэм индылонъёсыз, ӵектонъёсыз пыр потэм чылкыт малпанъёс гинэ адямивыжылэсь азьланьзэ кулэ ӧре пыртыны быгатозы. Со понна вань калыкъёс огазеяськыса, шундыё но сяськаяськись музъемез тынӥсь ас радаз берыктыны кулэ: кытын бурдъяськозы яратон, ог-огдэ валан, гажан но шумпотон. 

Яратонэн пачылмем егит сюлэм ӟырдыт тылын ӝуа, озьы ик адямилэн лулыз но ӟырдыт осконэн пачылмемын луыны кулэ. Вылӥ адӟонтэм кужымъёс адямилы котькуд ужаз юрттӥсь луо, адямиез утё, азьлань сюрес возьмато. Нимысьтыз ожгар операцие пыриськисьёс но ас кужыменызы гинэ ӧвӧл, «юрттӥсьёссылы» осконэнызы но лыз инбамен яркыт шундыез выльысь улонамы берыктыны тыршо. 

Выльысь но выльысь асьме зэмос воргоронъёс вордскем шаерзэс яратэмзэс но со понна зэмос утись луэмзэс возьмато, кужымзэс жалятэк ож лудын эшъёссылы юртто, быгатонлыкъёссэс будэто. Огшоры каньыл улонысь кыскем батыръёсмы выль ӧнерын дышемъёссэс выльдо. Котькудӥз соос пӧлысь улонзэ сётыны дась нылпиосызлэн, ӵыжы-выжыосызлэн шундыё, гань-гань улонзы понна. Тушмон музъемын мынӥсь ожмаськонъёс сярысь одӥгез но вераны уз дӥсьтэ, котькудӥз понна со секытэн йӧтэ, дыр. Адямиос но валаны кулэ: нимысьтыз ожгар операци чебер пуктэм суред ӧвӧл, со зэмос быронэн но кышкытэн герӟаськемын, нуналысь нуналэ выль ыштонъёсын пумиськоно луэ. Доразы бертэмъёслы каньыл улонэ берытскон понна семьязылэн, ӵыжы-выжыоссылэн яратэмзы но юрттэмзы кулэ луоз!

Арлэсь кема возьмам нимысьтыз ожгар операцилэн йылпумъяськонэз ӝоген мед вуысал! Котькудӥз утисьмы дораз сӧл-таза мед берытскоз! Шаермылэн яркыт но шундыё азьланез, котькуд адями понна вунонтэм шудбур луыса, шумпотон мед ваёз! Нылпиослэн жингрес куараоссы котькуд гуртлэн, карлэн урамъёсаз шулдыр крезьгурен мед кисьтӥськозы!

Тодады вайытӥськом, 24 тулыспалэ Россилэн кунмуртэз Владимир Путин ЛДНР-лэн куремезъя Донбасслы юрттон вылысь нимысьтыз ожгар операци кутскон сярысь ивортӥз. Асьме ёросысь воргоронъёслы, егитъёслы лулпуш юрттэт карыса, черкъёсын сюсьтылъёс пуктыны ӵектӥсько, соослэн сӧл-таза бертонзылы нимысьтыз вӧсь лыдӟемды но мултэс уз лу!