Кызык-мызык... кемгә кызык?

- Һай, җаным, - минәйтәм, - кемгә кирәк ул синең кызык-мызыкларың?! Бүген кешегә әйбәт хәбәр, яхшы-изге гамәлләр, үрнәк кешеләр турындагы язмалар түгел, юллардагы хәвеф-хәтәр, табигать бәла-казалары, үлем-китем... - кыскасы, сенсация кирәк, минәйтәм. Дөресе шулай, әнә, газетабызның электрон варианты - сайтыбызда да шундыйлар иң укылышлы язмалар. 40 ел гомерен туган авылына багышлаган кешеләр турында, бүген авыллардагы матур үзгәрешләр турында яздың ни дә, җаның авырткан проблемаларны күтәрдең ни... - барыбер. Укучыга мондый мәгълүмат та, фикерле язма да кирәк түгел. Уйланмый, баш ватмый гына укыла торган җиңел, кыска хәбәр кирәк адәм баласына. Дөрес, артистлар, "йолдызлар" тормышыннан, чынмы, уйдырмамы, гайбәтме икәнен дә аңлап булмый торган язмалардан туеп килә инде укучы, бәлки тора-бара "ЧП"лар да вакытлы бер мавыгу гына булыр? Тирә-юньдә, тормышыбызда матурлык аз диеп зарланышабыз да, үзебез иң элек әнә шул караңгы яклар турындагы язмаларга ябырылабыз. Матурлыкны күрә дә белмибез, күрергә теләмибез дә, ахры.

Фото: liveinternet.ru