Лена апа китте

Яңа елда балаларны котларга бүләк төяп Кыш бабай килсә, сугыш афәтләре кичергән ятимнәргә бүләк төяп Елена Вәлиева бара.

Норма авылында яшәүче волонтер Елена Вәлиева тагын юлга кузгалды, ерак араларны якын итеп, утлы ядрәләрдән курыкмыйча нәни дуслары янына юнәлде.

Бик рәхмәтле ул үзен тыңлаган шоферларга, аларның гаиләләренә, балалар йортына кирәкле әйберләрне алырга булышкан район халкына, юл чыгымнарын күтәрүгә өлеш керткән район җитәкчелегенә. Әлеге эш изге саналса да, Елена апага җиңелләрдән бирелми, барысын да тәртипкә салырга, исемлеген алып барырга, акчаларны тауарларга әйләндерергә кирәк. Өстәвенә әле хуҗабикә эшләре, бакча эшләре җитәрлек, оныклар да яраткан әбиләрендә еш кунак.

Әлеге минутларда Елена апа изге җанлы юлдашлары белән Мордовия якларын узып бара, исән-сау йөреп кайтырга, сабыйларын куандырырга язсын аларга. Ә инде ярдәме тигән һәр райондашка кылган гамәлләре үзләренә әҗер саваплары булып кайтсын.