Терекөмешле градусник ватылса кая шалтыратырга (фото)

Беренчесе 5 июнь көнне була. Районның бердәй дежур-диспетчерлык хезмәтенә (ЕДДС) 20 сәгать 02 минутта Балтач бистәсеннән градусник ватылуы турында хәбәр килеп ирешә (112).

Кичә шундый ук хәл бистәнең Балкыш урамында да теркәлә. Районның бердәй дежур-диспетчерлык хезмәтенә 13 сәгатьтә шалтырату була. Һәр ике очракта да килеп туган хәл тиз арада хәл ителә.
Диспетчерлык хезмәте белгечләре әти-әниләргә, өлкәннәргә градусникларны бала кулы җитәрлек урыннарга куймаска киңәш итә. Кеше организмына эләккән терекөмеш аксым алмашуга кире тәэсир итә, нерв системасына зыян сала,бөерләрне эштән чыгара, нәтиҗәдә, кешенең психикасын боза һәм йөрәк-кан тамырлары системасын җимерергә мөмкин.

Хөрмәтле райондашлар! Мондый очракларга юлыккан вакытта, кичекмәстән, 112 номерын җыегыз. Үз белдеклегегез белән терекөмешне җыярга алынмагыз.

Фотолар районның бердәй дежур-диспетчерлык хезмәтенеке.