Балтачта законсыз чүплекләр ничек бетерелә

Ә минималь штраф күләме 2 меӊ сумнан башлануын исәпкә алганда, чисталыкны санга сукмау шактый кыйммәткә төшкәне ачыклана. Җитмәсә, хәл вакытында төзәтелмәсә, штрафлар күләме бермә-бер арта. Димәк, штраф түләү - әле мәсьәлә хәл ителде дигән сүз түгел. Ләкин халыкка бу гына көчле тәэсир ясап бетерә алмый, ахрысы? Район башкарма комитеты каршында эшләп килүче чисталык комиссиясе (АДМ) утырышларына җаваплылыкка тартылган гражданнарның күпләп чакырылуы дәвам итә.

Хокук бозулар, нигездә, үз хуҗалыгы белән яшәүчеләрнең көн-күреш калдыкларын утильләштерүне тиешле дәрәҗәдә башкармауларыннан һәм теләсә-кая илтеп ташлауларыннан килеп чыга. Күптапкыр кисәтүләр ясауга, җаваплылыкка тартылулар булуга карамастан, хуҗалыгында җыелган чүпне авыл читендәге елга буйларына, агач араларына, урман-аланлыкларга алып барып ташлау очраклары, еш күзәтелә. Ә шул ук вакытта янәшәдәге күршесе, мәсәлән, үз хуҗалыгыннан җыелган чүпне бакчасында чокыр ясап күмеп барырга, икенче елда черемә итеп кулланырга мөмкин. Яисә инде каты көн-күреш калдыкларын үз территориясендә җыеп барып, авыл җирлеге идарәсе аша белешеп, хезмәт күрсәтүче оешмадан трактор арбасы куюларын сорарга мөмкин. Әлбәттә, бу төр хезмәт күрсәтү түләүле. Бу очракта берничә күрше берләшеп, тиешле сумманы бүлешеп түли да ала. Болай эшләү һәр кешенең чисталык эшләренә актив кушылуын гына булдырып калмый, ә чисталыкны саклауга булган җаваплылыгын да арттыра һәм тирә-якның чистаруына китерә. Җыелган чүп полигонга алып барып бушатыла һәм утильләштерелә.

Яз айларында барган чисталык икеайлыгы кысаларында гына түгел, ә бу мәсьәләне һәрдаим контрольдә тотарга кирәк. Соңгы елларда Балтач районының күпчелек авыл җирлекләрендә шәхси хуҗалыклардан чүп җыю мәсьәләсе тиешле тәртипкә салынды. Бу эшне районда ике оешма башкара. Чепья зонасына кергән авыллар өчен - Чепья күптармаклы җитештерү предприятиесе , ә Балтач торак-коммуналь хуҗалыгына караган өлешенә "Төзекләндерү" ("Благоустройство" ) җәмгыяте хезмәт күрсәтә. Хезмәткәрләре авылларда билгеле бер көнне, график буенча йөк машиналары белән чүпне җыеп, чүп базына алып барып бушаталар. Әлеге система авыл җирлекләрендә дә уңышлы гына башлангыч алды. Мәсәлән, Балтач, Нөнәгәр, Норма, Пыжмара, Чепья авыл җирлекләрендә бу төр эшчәнлек яхшы оештырылган. Алга таба районның барлык җирлекләрендә дә чүпне график буенча машиналар белән җыю кертеләчәк. Моның өчен хуҗалыктагы чүпне тиешле көнгә кап һәм капчыкларга яки тартмаларга тутырып капка төпләренә чыгарып кую гына таләп ителә. Хезмәт күрсәтелгән өчен айлык түләү квитанцияләрендә бер кеше башына 38 сум 70 тиеннән түләү хакы өстәләчәк.

Район административ чисталык комиссиясе рәисе Рамил Шакиров: "Соңгы елларда җирлекләрнең чисталыгына игътибар артканнан-арта бара. 2016 елда рәсмиләштерелмәгән чүплекләрне бетереп, чүпләрне Балтачтагы полигонга җибәрү буенча эш алып барыла. Шулай ук капка төпләрен, йорт һәм каралты-кура территориясен тәртиптә тотарга, "кызыл линия"дән чыгып, төзелеш материалларын, техника тотмаска кирәк", дип чакырды. - Җирлекнең киләчәген, яшәешен бергә кайгыртканда гына, биредә яшәүчеләрнең тормыш-көнкүреш шартлары яхшы булачагын беркем дә исеннән чыгармасын иде. Шуның өчен чүпне үтильләштерү мәсьәләсенә җитди карарга кирәк. Киләчәктә районыбыз җирлегендә законсыз чүплекләр бетереләчәк", дип искәртте.