Комбайн астында калган ир Казан хастаханәсенә озатылды

Эш урыннарында куркынычсызлык кагыйдәләрен үтәү һәрчак көнүзәк мәсьәлә булып тора. Урып-җыю кампаниясе чорында хезмәтне саклау, аеруча, игътибар үзәгендә. Төп игътибар техниканың төзеклегенә, комбайннарда, башка машиналарда аптечкалар һәм ут сүндерү җайланмалары булдыруга юнәлдерелә. Шулай ук урып-җыюда катнашучы эшчеләр белән чираттан тыш инструктаж үткәрү, аларны махсус эш киемнәре һәм саклану чаралары белән тәэмин итү дә гаять мөһим. Авыл хуҗалыгы һәм азык-төлек идарәсендә төзелгән махсус комиссия хуҗалыкларда хезмәтне саклау һәм хәвефсезлек таләпләре үтәлешен даими тикшереп тора.

Бәла аяк астында, ди халык. Урып-җыю тәмамланырга санаулы көннәр калганда Арбор басуында 1977 елгы комбайн ярдәмчесе "Нива" комбайныннан егылып төшеп, тәгәрмәч астына эләгә. Безгә килеп ирешкән мәгълүматлар буенча комбайн ир кешене аягыннан башына кадәр арткы тәгәрмәче белән үтә. Зыян күргән ирне район үзәк хастаханәсенә китерәләр. Хәле авыр булу сәбәпле, аны Республика клиник хастаханәсенең травматология бүлегенә китергәннәр.