Коймакчы Рифкать абый

Кариледән Рифкат абый Камалов коймакчы булып танылып килә, башта авылдашларын гына сыйласа, әкренләп районны яулый бара, аннан тагын да ераккарак китәр әле. Чөнки  миче күчмә,  үзе ясаган тагылма мич аның, машинага тагып йөри ала торган. Ә коймагының тәмлелелеге, телеңне йота торган. Камырын үзем ясамыйм, ди, әле менә күптән түгел мөмкинлекләре чикле балалар өчен пешерде, анысына камыр остасы Гөлфәния апа изеп биргән булган.

Рифкать абый — эшмәкәр, ремонт эшләре белән мәшгуль. Машинасына мич тагып, авыл буйлап коймак пешереп йөрүе — күңел өчен. “Кемдер балык тотарга яки гөмбә җыярга ярата. Ә миңа мичтә коймак пешереп, халыкка шуны авыз иттерү ошый. Бу — хоббием, процессы бик рәхәт”, — ди ул, елмаеп. Коймак чәйсез булмый. Шуны күздә тотып, Рифкать абый тимердән зур самавыр да ясаган. Ул самовыр турында кышкы чорда язып чыктык инде.

Бизнесмы бу, хәйриячелекме, анысы безгә мәгълүм түгел, әмма Рифкать абый һәм ул пешергән тәмле коймаклар Сабантуй  бәйрәменең яме, кунакларның иң тәмле сые.