Балтач егетләрен армиягә озата (+фоторепортаж)

Ватанны саклау, халыкның азат һәм тыныч яшәешен тәэмин итү өчен армиядә хезмәт итү, тәвәкәллек һәм батырлык күрсәтү - һәр ир- егетнең төп вазыйфасы . Көзен безнең районнан Ватанны саклау кебек мактаулы бурычларын үтәү өчен төрле гаскәрләрдә хезмәт итәргә 56 егет китәчәк. " Ил йомышы - олы йомыш ". Башкача була да алмый.

- Бер ел бик аз вакыт, әмма хезмәт итә башлагач хәйран вакыт икән. Тик шунысы бар - бу үзенә күрә бер сынау, - ди армия сафларыннан биш ел элек кайткан, бүген инде игезәк энеләре Альберт белән Робертны армиягә озатучы Ор егете Руслан Галәмов.

Район башкарма комитеты җитәкчесе урынбасары Илһам Гайнетдинов егетләргә мөрәҗәгать итеп, сынатмыйча намуслы хезмәт итеп, туган якларыгызга исән-сау әйләнеп кайтыгыз, дигән теләкләрен җиткерде. Район хәрби комиссары Васыйл Вәлиев илебез тыныч яшәсен өчен, сез үз бурычыгызны йөзгә кызыллык китермичә үтәргә тиеш, дип ассызыклады. Әлеге бәйрәмдә катнашкан башка кунаклар да егетләргә үзләренең җылы сүзләрен җиткерделәр. Армиягә китүчеләрнең әти-әниләре исеменнән Яңгул авылыннан Алмазның әнисе Зәмзәмия Миңнеханова чыгыш ясады.

Егетләр хөрмәтенә иң матур җырлар башкардылар. Егетләр үзләре дә батырлыкка, җитезлеккә сыналды. Бу кичә илебезнең булачак сакчылары хәтерендә озак сакланыр, ә изге теләкләр аларга армия хезмәтендәге кыенлыкларны җиңәргә ярдәм итәр, дип ышанасы килә. Дөньялар тыныч булсын да, хәерле хәбәрләр генә килеп торсын, рәхимле кешеләр кулына эләксен безнең солдатларыбыз.