"Чәй – җанга җәй" мәҗелесендә чәй генә булганмы... (фото)

- Харап икән диярсез... Әмма әле беребезнең дә мондый тәмле чәй эчкәне булмагандыр. Бөтнек, мәтрүшкә, җиләк яфрагы, җиләк, кызыл карлыган, чия салынган, чишмә суыннан күмер самоварында кайнаган чәй... телеңне йотарлык булды. Беркем дә буш кул белән килмәгән. Табын тәм-томнан сыгылып торды. Гөлшат апай белән Кадрия апай учакта пешергән коймак, Гөлзада апайның гөбәдиясе, Илсияр апайның кәрәзле балы, бөккәннәр, кош теле, тәмледән-тәмле пирог, печенье, чәк-чәк, җимеш, как һәм башка бик күп төрле күчтәнәчләр белән 3 !!! самовар чәй эчтек. Рәхәтләнеп биедек, уеннар уйнадык, күңелле истәлекләр сөйләшеп күздән яшьләр чыкканчы көлдек. Көлдереп безнең гомерне озынайтканнары өчен Фәридә апай белән Гөлзада апайга аерым зур рәхмәт! Кыскасы күңелле ял иттек. Чәй чынлап та күңелгә җәй икән... Без моңа чираттагы тапкыр инанып кайттык. Әле җәй беткәнче тагын бер очрашырга сүз куештык. Саф һава сулап, табигатькә хозурланып, әле ярый килгәнбез дип куандык. Килмәгәннәр үзләренә үпкәләсен, - дип язып куйган алар "ШАТ-Көшкәтбаш" төркемендә.

Көшкәтбашлылар үткәргән мондый чара башка авылларга да үрнәк булыр дип уйлыйм.