Экзитпол нәтиҗәләре буенча, "Бердәм Россия" өчен 70 процент кеше тавыш биргән

(Казан, 8 сентябрь,“Татар-информ”, Зилә Мөбәрәкшина). Экзитпол сораштыруының нәтиҗәләре буенча, "Бердәм Россия" партиясе өчен 70 процент кеше тавыш биргән. Бу хакта “Пирамида”дагы бердәм мәгълүмат үзәгендә РФ Сәяси фән академиясе әгъза-мөхбире, социология фәннәре докторы Андрей Тузиков хәбәр итте.

"Экзитпол рәсми нәтиҗәләрне күрсәтмәсә дә, якынча саннарны күрсәтә ала. Барлыгы тугыз мең кешедә сораштыру уздырылган. "Бердәм Россия" - 69,9 процент, КПРФ - 12,7, ЛДПР - 4,7, "Гадел Россия" - 4,3, "Коммунисты России" - 3,8, "Пенсионерлар партиясе" - 2,5, "Үсеш партиясе" 2,1 процент тавыш җыйган. Экзитпол сораштыруында 9000 кеше катнашкан", - диде ул.

"Бердәм Россия" партиясенең тавышлары бераз кимегәнен күзәтәбез. Бу – пенсия, өстәмә кыйммәткә салым реформалары нәтиҗәсе дип уйлыйм", - диде ул.

Әлегә партия исемлеге буенча Дәүләт Советына биш процентлы барьерны ике генә партия - "Бердәм Россия" һәм КПРФ уза. Андрей Тузиков әйтүенчә, ЛДПРның биш процентлы барьерны узарга мөмкинлеге бар.

• Экзитпол - сайлау участогыннан чыккан чакта тавыш биргән кешеләргә сорау бирү юлы белән сайлауга нәтиҗә ясау ысулы.