Факел клубына – 25 яшь

Ильнур, 21 ноябрь 2015 - 06:43

2581

"Факел" клубы 25 яшьлек юбилеен билгеләп үтте. Чарага клубка нигез салган, аны булдыруга көчләрен кызганмаган, заманында җитәкче һәм тренерлар, укытучы-тәрбияче булып эшләгән шәхесләр чакырулы иде.

Истәлекләр, тәбрикләү сүзләре, бүләкләр бик мулдан булды бу көнне. Җыр-биюләр бәйрәмгә тагын да ямь бирсә, тарих эзләре буенча эшләнгән видеоязмалар безне кабат клуб оешып эшли башлаган елларга алып кайтты. Биредә канат ныгыткан егет-кызларны фотолардан күреп, бүген аларның районның күренекле кешеләре булуларына сокланып утырдык. Әмма халыкның аз килүе, турыдан-туры клуб белән бәйле кешеләрнең барысы да килмәве авыр хисләр калдырды.

Ныклы нигез салынганга күрә үткәне, бүгенгесе бар, киләчәге дә өметле булачак, диделәр кунаклар. Амин, шулай булсын. "Факел"ның утлары көннән-көн ныграк янсын.