Кенәбаш күленә аккошлар төшкән

Бүген Кенәбаш күлендә йөзгән аккошларны күрүчеләр булдымы икән?! Гадәттә, аккошларны парлап күрергә өйрәнгән без, ә бу юлы күлдә өч аккош йөзә.

— Ел да шулай өчәү киләләр алар, — ди аккошларны фотога төшереп алган укучыбыз Зөфәр ага. — Быел да менә өчәү килделәр. Икесе янәшә йөри, берсе читтәрәк йөзә.

Аккошлар алар искиткеч матур кошлар, әкияти сихри җан ияләре. Аларны күрү бәхеткә кинәнү белән бердер ул. Аучыларның бу матурлыкка атарга куллары күтәрелмәсен иде, йөзсеннәр, куанып очсыннар, табигатебезнең күрке булып яшәсеннәр иде.