Нормада күршеләр Сабантуй оештырган (+фоторепортаж)

Шулай итеп 13 июль көнне кич белән Норманың Каюм Насыйри урамында яшәүчеләр бер булып, бүләкләр, уенчыклар, тәм-томнар әзерләп Сабантуйга җыелдык. Шушы урамда әти-әнисе торган, үзләре читтә яшәгән яшь гаиләләр дә кушылды. Урам башына, матур тау битенә бертөркем бала-чага җыелды. Сабан туебыз изге теләктән, Алмаз хәзрәтнең догасы белән башланып китте. Ул балаларга табигатьне кадерләргә кирәклеген, Җир-Ананы пычратырга ярамаганлыгы хакында мәгънәле вәгазь сөйләде. Чүпләрне махсус пакетларга салырга кирәклеген аңлатты.
Чүлмәк вату, капчык киеп узышу, күз бәйләп баудан әйбер кисү, кашыкка йомырка куеп йөгерү, кашык белән су ташу кебек берсеннән-берсе кызыклы ярышларда балалар да, өлкәннәр дә бик теләп катнаштылар. Каян ишетеп алганнар, күрше-тирә урам балалары да килгән иде. 50дән артык бала, урамыбыздагы 12 йортта яшәүче һәркем чын күңелдән бәйрәм итте. Һәркайсына бүләкләр бирелде.

Бу бәйрәмне оештыруда һәр йортта яшәүче үз өлешен кертергә тырышты. Апалар чәй тәм-томнары, коймак, көлчәләр пешереп алып килгәннәр иде. Күрше абыйлары өч күмер самавары гөрләтеп җибәрделәр. Руфия апа, Васыйл абый Мөҗиповларның кыз-уллары Зөлфия Галиева, Илһам, Булат гаиләләре аеруча нык ярдәм итте. Алар пешерткән пылау белән мантый телләрне йотарлык тәмле иде. Ә Алмаз хәзрәт балаларны сөендереп, татлы мамык белән сыйлады.

Сабантуйга жыелган барлык кеше ахырдан бергәләшеп тәмләп чәй эчеп, биеп күңел ачып, "Киләсе елга да шулай уздырыйк!" дип таралышты. Балаларны сөендереп шундый матур бәйрәм оештырган өчен бөтен күрше-тирәләргә Аллаһының рәхмәте булсын! Амин!
Балаларыбыз хакына оештырган бу бәйрәмнән һәркем канәгать калды. Күршеләр белән дус-тату, бердәм булып яшәүләргә ни җитә?!

Лилия Зарипова (Зәйнуллина)
Норма авылы