Салавыч фермасында ... сыерчык оялары!

Ильнур, 27 май 2014 - 05:29

2393

Гадәттә үзен әллә кемгә куйган кайберәүләр ферма, анда эшләүчеләр турында сүз чыкса, "фу" дип борын җыерырга ашыга.

Янәсе, анда мал-туар, тирес-силостан башканы белмәүчеләр, башка берни белән кызыксынмаучылар эшли. Юк, алай түгел, җәмәгать! Әнә, утыз еллап Салавыч фермасында сыер савучы Миләүшә Фатыйхова: "Китап укырга бик яратам, авыл китапханәсендә мин укымаган китап калмады да бугай", - ди.

Шушы ук фермага баргач, лаборатория бинасы өстендә сыерчык оясы күреп, үзем дә аптырап калдым. Әле сыерчыгы да сайрап-җырлап утыра иде, мин фотоаппаратны тартып чыгарганчы, очып китте. "Әнә тегендәге колгада ике катлы тагын бер оя бар әле, аларына сыерчык килмәс дип көлешкән идек, килде бит, - ди лаборант-компьютерчы Гөлия Хөрмәтуллина. - Сәләхетдин Хисамиевлар калдык такталардан гына ясаган иде аны"...

Димәк, ихластан, җан җылысын кушып ясаганннар. Ихласлылыкны кошлар да сизә...