Шырыт киё, ӟеч мылкыдо бускеле

Агафья Арсентьевна Васильева улэ Казаньын, но пенсие потэмез бере тулысысен сӥзьылозь вордскем гуртаз, Вукогуртын улэ. Вазь ӵукна султыса гуртысь пудоосты но соосты возьмасьёсты келя нуналды ӟеч мед ортчоз шуыса. Ӝыт нош ик кутьыез пумитаны потэ, аслаз пудоосыз ӧвӧл ке но. Собере нуналлы быдэ бодыоссэ кутыса бусыос дуртӥ скандинавской амалэн ветлэ, куддыр урам кузя но. Толалтэ Казаньын улыкуз куасэн ветлэ. Сэзь, чырткем мылкыдын улон шоры учкись, дораз пырем муртъёсты кунояны яратӥсь адями со. Арлы быдэ гуртысь егитъёсты но мӧйыосты семык ӝыт дюушанэ ӝутка.
— Пичи дыры тупаз туж секыт улон дыръя. Одӥг коркан кык бадӟым семьяос улӥмы. Сютэм улон дыръёс вал соку. Турым-куарен но вуэн кӧтмес тырыса, урамтӥ бызьылыса шудыку, кӧт пушкамы колтыр-колтыр каре вал. Озьы ке но ваньзэ чидамы. Ижевскысь университетын дышетскыса потӥ, дышетӥсь луи. Дышетыны лэзизы Глазов дорысь Понино школае, коллективмы туж умой, эшлыко вал — шуэ со тадаз вайыса. — Гуртысьтымы Кузьма Гаврилович Васильевлы быземе бере мон пичи пиеным ньыль ар Пониноын улӥ на, нош кузпалэ Казаньын. Берло ини Казаньын улон интымы луиз, семьямы огазеяськиз. Собере нылы вордӥськиз. Школаын иностранной кылъя дышетӥ пенсие потытозь. Туж юрттӥ нунокъёсме будэтыны, пыд йылазы султыны.
Егит дыръям нимме ӧй кельшыты. Гуртын куинь Агафьяос вал. Милемыз медаз суралэ шуыса огмы шоры вазьылӥзы Огок шуыса, мукетыз луиз Огопья, мон — Огош. Ужаны кутскем бере эшъёсы но тодмоосы Ганна шуыса нимазы, аслым но кельшиз тазьы нимамзы.
Та кышномурт котьку но кельышлы, ас дырызлы тупась ӟеч материалъёслэсь вурем дӥськутъёс нуллэ вал. Элегантной, вылӥ ӟечлыко дӥськутъёссэ гуртысьтымы нылъёслы сётъялляз, тужгес ик милемлы. Ми уго анай-атайлэн вить нылъёсыз вал, Огош апайлэн дӥськутэз но пыдкутчанэз милемлы мултэс ӧз луы. Лымшор палась ваем адӟеммы луымтэ емышъёсын кунояз. Огош апай милемыз котьмалы дышетылӥз, кылсярысь, кызьы дӥськут миськоно, кӧня порошок пононо, выжез но укноосты кызьы миськоно, буяны дасяно. Милям анаймы будэмын вал анайтэк, берло синтэм песянаез но кулӥз. Соин дышемез тырмыт ӧй вал, дыр, милемыз дышетыны. Одӥг пол тау карон интые ми, пичиос, Огош апайлэсь киын нуллон чебер зарнивуам пичи чассэ лушкамы, но соку ик берен сётӥмы.
— Кызьы сыӵе дуно, чебер, ӟеч сукноен вурем костюмъёс, дэремъёс басьяны быгатӥды, магазинын но ӧй вал сыӵе дӥськутъёс? Лымшор палъёсы но ӵем ветлылӥды шутэтскыны, уждун туж трос басьтыса ужады-а, мар-а? — юамелы шуиз: «Понино гуртысен Глазовозь кыдёкын ӧй вал, та город соку «закрытый» вал, атомной предприятие отын ужаз. Та городын кыӵе но сиён-юонъёс, арбериос ӧй вал! Котьмар басьтыны быгатӥ, бадӟым багажен бертылӥ. Уждунме люканы тырши, анай-атайлы но юрттыны быгатӥ, кузпалылэн семьяезлы но уксё сётӥ выль корка пуктыны. Табере аслым ик кылдӥз со коркан улыны, шумпотыса улӥсько».
Туэ, коронавирусэн сэрен, вукогуртъёс семык дюушанэ но ӧз люкаське, Огош апаен но адӟиськыны ӧз кылды ай. Сӧл-таза улыса, ӝоген мед пумиськомы.

Вера Лобанова
Вукогурт