“Сәләт” - тормышымның аерылгысыз бер өлеше, ди Гөлназ

Аннан алган тәэсирләре белән Гөлназ безнең белән дә уртаклашты: "Сәләт дөньясына мин 2013 елның җәендә Биләр форумы аша килеп кердем. 4 ел рәттән "Сәләт" аланнарында ял иттем. Быел "Сәләт-Изге чишмә" аланында булырга насыйп булды. Гомумән алганда, "Сәләт" - мөмкинлекләр мохите. Монда һәркем үзенә ошаган шөгыльне таба ала (җыр-бию сәнгате, КВН, интеллектуаль үсеш, тарихны өйрәнү, эшмәкәрлек серләренә төшенү, компьютер технологияләре), шәхес буларак формалаша. "Сәләт" елдан-ел үсә, камилләшә. Хәзерге вакытта ул чит илләрдә үзенең аланнарын ача. "Сәләт" - тормышымның аерылгысыз бер өлеше. Мин монда бик күп дуслар таптым һәм хәзер дә алар белән аралашып торам".

Киләчәктә белем алуын дәвам итәр өчен Гөлназ КФУның өч факультетына документларын тапшырган. Әлегә кайсында укыячагы билгеле түгел. Шулай да анда да Гөлназыбыз әйбәт укып, безне һәм укытучыларын сөендереп торыр дип ышанып калабыз.