Зәмһәрир суыкларга борчылырга түгел, ә сөенергә генә кирәк»

Арча районының Ашытбаш авылында яшәүче халык синоптигы Рәис абый Шәкүров кышка керер алдыннан, 30-40 градуслы суыклар булачак, дип кисәткән иде. Менә килеп тә җитте ул зәмһәрир суыклар. 

Ә Рәис абый үзе бу салкынны алай ук искитәрлек суык дип санамый. 
- Менә элек була иде ул зәмһәрир салкыннар. Айлар буена 40 градус була иде. Әтинең битләре өши, атының борынына бозлар ката иде. Андый суыклар хәзер ике-өч көн генә була. Иң салкын көн бүген иде. Өч-дүрт көннән кар явып, җылыта башлаячак. Февральнең унысыннан мартның егермесенә чаклы салкын көннәр булачак әле. Мондый ук суык булмас анысы, уртача 20-22 градус булырга тиеш. Анысы хут суыгы дип атала. Кайбер елларны 30-40 градуска чаклы җитә иде ул. Әтиләр хут суыгы сыерның мөгезен сындырырга мөмкин дип әйтә иде. Ул төнлә генә була, көндез җылыта. Ә җәй өчен ул бик мөһим. Кырык көн хут суыгы булса, җәй бик яхшы булачак. Электән үк хут суыгын бик көткәннәр. Кайбер елларны ул булмый да кала, - ди Рәис абый.   
Бу көннәрдәге суыкларның уңай ягы да юк түгел икән.

- Аның өчен борчылырга түгел, киресенчә сөенергә генә кирәк. Кышы кыш төсле булса, җәе дә җәйчә киләчәк. Бу суыклар юкә чәчәге аткан вакытка – июль башларына туры килә. Ә аңа эссе, яңгырсыз көн кирәк. Мондый көндә умарта кортлары өчтән үк торып, бал җыярга китә. Менә шул: юкә балы әйбәт булачак дип сөенәм әле мин, - ди халык синоптигы.

Чыганак