Балтачта көзге каникуллар башлана

Безнең белешмә: агымдагы елның 9 аенда Татарстан Республикасында балалар катнашында 331 юл-транспорт һәлакәте теркәлгән, аларда 11 бала һәлак булган, 370 бала төрле дәрәҗәдәге тән җәрәхәтләре алган. Балтач районында агымдагы ел башыннан балалар катнашындагы һәлакәтләрдә 2 бала төрле дәрәҗәдәге имгәнүләргә дучар булган. 1 бала авариядә пассажир буларак катнашса, икенчесе җәяүле һәм үзе гаепле.

29 октябрьдән балаларнын көзге каникуллары башлана. Район ЮХИДИ бүлеге бу чорда барлык әти-әниләрнең тагын да игътибарлырак булуларын сорый. Балалар өлкәннәрдән башка юлда йөргәндә юл кагыйдәләрен дә онытмаска, транспорт хәрәкәт итә торган юллар янында уйнамаска да тиешләр.

Көн саен республика юлларында йөзләгән юл-транспорт һәлакәтләре теркәлә, аларда балалар да зыян күрә. Бары тик җәяүлеләр дә, шоферлар да кагыйдәләрне үтәгәндә генә, якыннарыбыз фаҗигаләргә юлыкмас дип ышанып була. Шуңа да балаларның каникуллары тыныч һәм хәвеф-хәтәрсез үтсен өчен барыбыз да игътибарлы булсак иде.

Лилия Һадиева

«Юл хәрәкәте иминлеге» дәүләт бюджет учреждениесенең Балтач бүлеге җитәкчесе