Авариядә үлгәннәрне искә алу көне

2005 елдан башлап ноябрьнең өченче якшәмбесе юл фаҗигасендә үлүчеләрне искә алу көне итеп билгеләп үтелә.
Акциянең төп максаты – юл-транспорт һәлакәтендә үлүчеләрне тагын бер кат искә алу һәм шулай ук аварияләнең күп булуына игътибарны юнәлтү.

Юл-транспорт һәлакәтендә үлүчеләр күбрәк (15-25 яшь) яшьләр арасында булуы бигрәк тә аяныч.

2018 елның 10 айлык мәгълүматләренә карасак республика буенча юл-транспорт һәлакәтендә 309, ә безнең районда 6 кеше һәлак булды.

Тизлекне арттыру, каршы хәрәкәт өчен билгеләнгән полосага чыгу һәм спиртлы эчемлекләр кулланган килеш транспорт белән идарә итү– иң зур фаҗигага илтүче факторлар.

Җәяүлеләр белән булган аварияләр дә сагаерга мәҗбүр итә. Кичләрен караңгы бик тиз төшэ. Җәяүлеләрнең саклыгы өчен киемнәрендә яктылыкны кире кайтара торган элементлар булдыру аларнын гомерен саклап калу өчен бик тә кирәк. Караңгы вакытта шоферга, кара киемле дә булса, җэяулене күрүе кыенлаша, ә яктылык кайтарткычлар күрү аралыгын 3 тапкырга кадәр арттыралар. Статистика буенча җәяүлене бәрдергән аварияләрдә кубесе караңгы вакытта җәяүлене күрмәү сәбәпле килеп чыга.

2017 елның 1 июленнән юл хәрәкәте кагыйдәләренә 7 яшьлек баланы машинада арткы урындыкта ремень белән эләктереп йөртергә дә ярый дигән үзгәрешләр керсә дә, баланың куркынычсызлыгы өчен Юл хәрәкәте инспекциясе 12 яшькә кадәр креслода утыртып йөртергә киңэш итә. Ә алдагы урындыкта 12 яшькә кадәр креслога утыртып йөртү мәҗбүри.

Юл-транспорт һәлакәте булмасын өчен, юл хәрәкәтендә катнашучыларның барысының да кагыйдәне төгәл үтәве нәтиҗәсендә генә ирешеп була. Беребезгә дә якыннарыбызны югалту ачысын татырга язмасяын, юлларда исән-имин йөрик!!!

Лилия Һадиева,
Балтач Юл хәрәкәте инспекциясе.

Фото: Гөлзидә Газизуллина