Балтач уянганчы «Тоннель» эшен башлый

«Тоннель» операциясе районыбызның төрле авылларында яки Балтачның төрле җирендә үткәрелә ала, бу юлы ул хәрби комиссариат каршында узды. Дәүләт автомобиль инспекциясенең Балтач бүлекчәсе хезмәткәрләре белән берлектә әлеге рейдта участок вәкилләре дә гел катнашып килә. Бу чара әле Балтач халкы йоклаган вакытта ук иртәнге сәгать биш тулып киткәч башланып китеп,  берничә сәгать дәвам итте.

ДАИ хезмәткәрләре һәм участок вәкилләре автомобильләрне туктатып, үзләре белән таныштырганнан соң, шоферлардан документларын сорап алалар. Аларны тикшергән арада берара тынлык урнаша. Бу вакытта күп шоферлар үзләрен тыныч тоталар, аларның эше икәнен аңлап кабул итәбез, диләр. Арада каушап калучылары да бар, бигрәк тә гүзәл затлар. Нинди документны күрсәтергә белмәгәннәре дә очрады, андыйларга инспекторлар ярдәм итеп, киңәшләрен дә бирделәр. Әгәр шоферларның машина документлары тәртип һәм алар кагыйдәләрне бозмаган икән, мондый шоферлар озак тормый, кузгалып та китәләр. Ә инде машина номерлары укылмас хәлдә пычрак булган яки башка төр кагыйдәләрне бозганнар икән, аларга инде озаграк торырга туры килде.

27 гыйнвар көнне үткәрелгән рейд барышында барлыгы 37 машина туктатылып, 8 шоферга карата беркетмә төзелде. Шуларның алтысы – укып булмый торган хәлдәге номерлы машина белән йөрүчеләр, берсе – иминият полисына язылмаган, берсе – йөк машинасы белән керергә тыелган билгегә кергән. Бу юлы алкоголь кулланган шоферлар да, балаларын махсус креслога утыртмый йөртүчеләр дә булмады. Әллә очраклык, әллә инде шоферлар да тормышның кадерле булуын аңлап йөри башлады.